1 Тимотеј 3
Сар ваљани те овен о водачиа
1Точној тано дека кога некој мангела те овел водачи ки црква, мангела бут шукар бути. 2Според одова, о водачи требела те овел: непорочно, ром јеке ромнаја, нерно, гоѓавер, шукар углед, гостољубливо, способно баши те сикавел; 3на пијанџија, ниту на те ќерел са силаја, на само те мислинел баши о паре, него кротко, те на овел те распрајнелпе, хем те на овел алчно, 4кој управинела шукар пле кхереја хем исиле покорна чхаве целосно те поштојненле, 5соске ако на џанела те управинел пле кхереја, сар ка грижинелпес баши е Девлескири црква?
6Те на овел нево обратимо, за да ма те вазделпе ко баро хем те перел ки осуда е бенгескири! 7А требела те овел хем те ќерен шукар лафи олескоро хем авријалдан, за да ма те перел ки стапица е бенгескири хем те лаџаќерелпес.
Сар ваљани те овен о ѓакојна
8Исто аѓар, о ѓакојна требела те овен чесна, на дујмујале, те на манген бут мол, на алчна баши мелале паре, 9кој пазинена и тајна е веракири чисто совестеја. 10Хем ола прво те овен испитиме, хем после те ќерен и служба ако тане непорочна.
11Исто аѓар о ромња ленгере требела те овен чесна, те на клеветинен; нерне хем верна ко са.
12О ѓакојна те овен рома јеке ромнакере, кој управинена шукар пле чхавенцар хем пле кхеренцар, 13соске окола, кој извршинге шукар пли служба добинена чесно положба хем бари смелост ки вера ко Христос Исус.
Бари тани и тајна е девлипаскири
14Акава пишинава туке, надинавама дека скоро ка авав ки туте; 15ама случајно те забајнѓума, те џане сар те понашинетут е Девлеске ко кхер, кој тани црква е џивде Девлескири, стубо хем потпора е чачипаскоро.
16Хем бизо сумна, бари тани и тајна е девлипаскири:
Окова, Кој јавинѓапе ко тело,
сине оправдимо ко духо,
сикаѓапес е ангеленге,
сине најавимо машкар о народиа,
поверујнгеле ко свето,
сине вознесимо ки слава.