Romano Prevod Tari Biblija

1 Timotej 5

Сајдин саринен

1Ма aкоштут oштро попхуре манушеја, него опоменинле сар дадеске, е потернен сар пхрајља, 2о попхуре џувља сар даја, о потерне сар пхејна секоле чистотаја.

Сајдин е удовицен

3Поштојн е удовицен, кој тане чачикане удовице. 4Ако некоја удовица исила чхаве или унуќа, ола нека сиклон прво те сикавен побожност ки пли фамилија, хем те иранен пле родителенге, соске одовај тано шукар хем угодно англо Девел.

5А која тани чачикани удовица хем ачхили коркори, ој чхиѓа пли надеж ко Девел хем тани постојано диве и рат ко родиба хем молитве. 6А окоја кој живинела баши задоволствиа џивди тани мули.

7Пренесин хем акава: те овен непорочна. 8Ако некој на грижинелапес баши пленге, особено баши о кхерутне, одрекујнѓапе тари вера хем тано побилачхо таро окова кој на верујнела.

9Е удовиценге ко списако те пишинелпе асавки удовица, која нае тани потерни таро шовардеш берш, која сине ромни јеке ромескири, 10кова исила сведоштво баши шукар дејља; ако дикхља е чхавен, ако сине гостољубливо, ако тхоѓа о пре е светиенгере, ако поможинѓа е цидименге; хем ако џала сине пало секова шукар дело.

11А потерне удовице ма примин, соске кога ка циденлен о телесна страстиа спротивно таро Христа, мангена те жениненпе, 12солеја цидена упри песте осуда, соске отстапинге таро прво ветување. 13А освен одова, соскеј тане бизи бути, сикловена те џан ко кхера. Хем на само бизи бути, него хем тале лафчике хем са мангена те џанен, хем ќерена лафи со на требела.

14Хем аѓар, мангава о терне удовице те жениненпес, те бијанен чхавен, те водинен домакинлуко, за да мате ден е противникоске нисаво муј баши те хулинел. 15Уствари, некој веќе заостранинге хем цидинге пало сатана.

16Ако некој верно или верна иси удовице, нека поможиненлен, хем нека мате овел оптеретими и црква, за да те шај те поможинел околенге кој тане чаче удовице.

Сајдин е старешинен

17Е старешиненге, кој ќерена шукар пли бути, требела те сикавелпе ленге дупло сајгија, посебно околенге кој трудиненапе ко слово хем поучинена. 18Соске о Свето Писмо ваќерела: „Ма пхан о муј е гурувескоро со ќерела ѓив“ хем „о работнико заслужинела пли плата.“

19Ма примин кога некој ваќерела против о старешине, освен пали изјава таро дуј или трин џене сведоќа. 20Окола кој грешинена кошту ленцар англо сарине, за да те овел е јаверенда дар.

Пазин пред те судине хем те ќере нешто

21Хем задолжинаватут англо Девел, хем англо Христос Исус, хем англо избириме ангејља, те пазинеле акава бизо пред те судине хем те ќере нешто те делине сар ка авел туке.

22Ма чхив те васта пресигате никаске, ма ле дело ко туѓа гревиа! Пазинту чисто тут!

23Ма пи више само пани, него ле похари хем мол, баши тло желуднико хем често насвалипа.

24О гревиа некаскере манушенгере дикхјона хем џана ко судо англедер оленде, а некој џана пало ленде. 25Исто аѓар хем о шукар дејља дикхјона, а хем кој нае тане, нашти те гаравенпес.