2 Петрово 1

Поздрав

¹О Симон Петар, слуга хем апостоли е Исусе Христоскоро, џи ко окола, кола преку и правда амаре Девлескири хем Спасители о Исус Христос приминге исто скапоцено вера сар хем амен; ²о благодат хем о мир те умножинелпес ко пенџариба е Девле хем е Исусе, амаро Господари.

Ов денѓа амен са сој аменге потребно

³Соске Лескири Девликани сила денѓа амен са сој аменге тано потребно баши живот хем побожност, преку пенџариба Околе, кој повикујнѓа амен преку Пли сопствено слава хем шукарипа, ⁴солеjа аменге денде скапоцена хем најбаре ветувања, та преку оленде те овен учесниќа е Девлеске ки природа, откога нашлен таро румимо живото, ковај тано ко свето, преку погрешна страстиа, кола владинена ко свето;

⁵баши одова ден са тумендар хем исполнинен тумари вера шукарипаја, а о шукарипа е џандипаја, ⁶а о џандипа со воздржливост, а о воздржливост со трпение; а о трпение со побожност; ⁷а о побожност пхраликане мангипаја; а о пхраликано мангипа мангипаја. ⁸Соске ако иси тумен са адава хем адава умножинелапе, на ќерела тумен мрзлива хем неплодна ко пенџариба амаре Господаре е Исусе Христо. ⁹Ама, кас нае одова, королој тано хем кратко дикхела: соске бистерѓа дека тано очистимо таро пле пуране гревиа.

¹⁰Одолеске пхрајљален, погрижинен тумен панда повише те зацврстинен тумаро позив хем избор. Уствари, ако ќерена одова никогаш нае те сопнинен тумен. ¹¹Соске аѓар ка делпе туменге изобилно те кхувен ко вечно Царство амаре Господареске хем Спасители о Исус Христос.

¹²Одолеске ка дикхав секогаш те потсетинав тумен баши акала буќа, иако џанена тумен, хем сијен утврдиме ко авдосутно чачипа. ¹³Ама мислинава дека тано право џи коте сијум ко акава шатори ко мло тело, те џангавав тумен опоменибаја, ¹⁴соске џанава дека скоро ка мукав мло шатори, сар со известинѓа ман баши одова амаро Господари о Исус Христос, ¹⁵а ка настојнав тумен, хем пало мло џајбе, те спомнинен секогаш баши акава.

Дикхлем Олескоро барипе

¹⁶Соске кога објавингем туменге и сила хем о ајбе амаре Господарескоро о Исус Христос, амен на следингем лукава измислиме бајќе, ама улем очевидциа баши Олескоро барипе, ¹⁷соске Ов приминѓа таро Девел о Дат чест хем слава, кога тари величествено слава ало Леске о гласо: „Акавај тано Мло мангло Чхаво, ки Касте Ми милина тани.“ ¹⁸Амен шунгем о гласо, кој ало таро небо, кога сијем сине Олеја ки свето гора.

¹⁹Хем аѓар иси амен поцврсто пророчко слово, а тумен ќерена шукар со пазинена ки лесте, сар светило со светинела ко темно тхан, џи коте на правѓола о диве хем и Деница засветинела ко тумаре срциа. ²⁰Џанен акава англедер о са: ни јек пророштво ко Свето Писмо нашти те толкујнелпе кој сар мангела, ²¹соске никогаш о пророштво на ало тари манушикани војља, него о света Девлескере мануша ќерена сине лафи водиме таро Свети Дух.