Проповедин о Слово

¹Задолжинава тут англо Девел хем о Христос Исус, Кој тано готово те судинел е џивденге хем е муленге, Олескере јавибаја хем Олескере Царствоја; ²проповедин о слово, настојн ко време хем ко невреме, ваќер коте грешинена, викин ленге, охрабрин са те стрпленеја хем сикљојбаја.

³Соске ка авел време, кога о мануша на ка трпинен и састи наука, него според пле страстиа ка кхеден песке учитејља, баши те овел оленгере каненге шукар, ⁴хем ка иранен пле кана таро чачипе, а ка ираненпес ко парамиса.

⁵А ту ов трезвено ко са, трпин о цидибе, извршин и бути евангелисти, исполнин тли служба џи ко крајо. ⁶Соске ме веќе чхорѓовава сар жртва, хем о време мле џајбаскоро ало. ⁷Марѓум ман шукар борба, завршинѓум о прастајбе, запазинѓум и вера. ⁸Отакана поадари спремимој тано мо венцо е правдакоро, со ка деле манге ко одова Диве о Господари, о Праведно Судија, хем на само манге, него хем сариненге, кој замангле Олескоро јавиба.

О Господари денѓа ман сила

⁹Погрижин тут те аве скоро ки манде, ¹⁰соске о Димас мукља ман, соске замангља о авдисутно свето хем гело ко Солун; о Крискент гело ки Галатија, о Тит ки Далмација. ¹¹Само о Лука тано уза манде. Ле е Марко хем анале туја, соске манге тано корисно баши служба. ¹²Е Тихике бичхаѓумле ко Ефес. ¹³Кога ка аве, ана и наметка, со мукљумла ки Троада узи карпа, хем о лила, поготово о пергаментиа!

¹⁴О Ковачи о Александар ќерѓа манге бут билачхипе; о Господари ка платинел леске според олескере дејља. ¹⁵Хем туда пазин тут олестар, соске противисалило бут баши амаре лафиа.

¹⁶Ки мри прво одбрана никој на сине манцар, него сарине мукле ман; нека ма те рачунинелпес ленге одова! ¹⁷Ама о Господари ачхило манцар, хем денѓа ман сила, за да те исполнинелпес о проповедиба преку манде, хем те шунен са о народиа; хем избавинѓум ман таро е лавескоро муј. ¹⁸О Господари ка избавинел ман таро секова билачхо дело хем ка запазинел ман баши Пло Небесно Царство. Олеске слава баши вечна вејќа. Амин!

¹⁹Поздравин е Прискила хем е Акила хем Онисифорескоро кхер! ²⁰О Ераст ачхило ко Коринт, а о Трофим мукљумле насвало ко Милет. ²¹Погрижин тут те аве англедер о јевен! Поздравинена тут о Еувул, о Пуд, о Лин, и Клаудија, хем са о пхрајља.

²²О Господари о Исус Христос те овел тле духоја! И благодат те овел туменцар. Амин!