Romano Prevod Tari Biblija

Tit 1

Поздрав

1О Павле, е Девлескоро слуга хем апостоли е Исусе Христоскоро, според и вера таро е Девлескере избириме хем о пеџариба е чачипаскоро, која тано според о девлипа, 2ки надеж баши вечно живото, со англедер о вечна времиа ветинѓа о Девел, Кој на ховавела, 3а ко пло време јавинѓа Пло Слово преку проповед, сој манге тано доверимо манге според и заповед е Девлескири, амаро Спасители – џико Тит, о чачикано чедо, е заедничко веракоро: 4о благодат, о милост хем о мир таро Девел о Дат хем о Господари о Исус Христос, амаро Спасители.

Сар ваљани те овен о старешине

5Одолеске мукхљумтут ко Крит, за да те средине о несовршимо хем баши те постајне старешине ко са о дизjа, сар со наредујнѓум туке; 6ако тано некој непорочно, ром јеке ромнакоро, ако исиле чхаве кој верујнена, кој нае тане обвиниме баши румиме буќа или непокорност; 7соске окова сој одговорно сар Девлескоро кхер со водинела требела те овел непорочно: на само пес те дикхел, на хољамо, на пијанџија, на тепачи, на алчно баши нечесно те зарадинел, 8него гостољубливо, амал е шукарипаске, гоѓавер, праведно, свето, воздржинелапе, 9кој иќерелапес цврсто баши о верно слово, согласно е наукаја, за да те шај хем те опоменинел ки састи наука хем те ваќерел оленгере грешке околенге кој противиненапес.

Иси бут со ќерена лафи ко чучо хем ховавне

10Уствари, иси бут непокорна, хем со ќерена лафи ко чучо хем ховавне, особено таро обрезиме, 11каскере требела те пханденпес о муја ленгере, соске ола баши нечесно те зарадинен растуринена цела кхера, сикавенален одова со на требела. 12Јек олендар, оленгоро сопствено пророко, исиле ваќердо: ‘О Критјајна тале секогаш ховавне, билачхе ѕвејра, мрзлива хем мангена превише те хан!’

13Акава сведоштво тано чачикано; одолеске акоштут ленцар оштро, за да те овен састе ки вера, 14за да тена ден внимание е јудејско парамисенге хем о заповедиа е манушенгере кој ираненапес таро чачипе.

15Баши о чиста сај тано чисто; а баши окола кој тане нечиста хем кој на верујнена, ништо нае тано чисто, него мелале тане оленгоро о разум хем и совест. 16Исповединена дека пенџарена е Девле, ама одречиненапес е делонцар, сар одвратна хем непослушна хем неспособна баши саво хем те овел шукар дело.