Поздрав џи ки црква ко Ефесјајна

¹О Павле, преку е Девлескири војља апостоли е Исусе Христоскоро, џи ко света ко Ефес хем о верна ко Христос Исус: ²о благодат ки туменде хем мир таро Девел, амаро Дат хем таро Господари о Исус Христос!

Благословиме ко Христос

³Те овел благословимо о Девел хем о Дат амаре Господарескоро о Исус Христос, Кој благословинѓамен, ко Христос, секоле духовно благословеjа, ко небесна тхана; ⁴соске избиринѓамен ки Лесте, англедер те создајнелпе о свето, за да те ова света хем непорочна англо Лесте ко мангипе. ⁵Сар со определинѓамен англедер за да те посининел амен преку о Исус Христос, пали гудли намера тари Пли војља, ⁶за да те овел фалими и слава тари Лескири благодат, колаја дарујнеламен ко Мангло, ⁷ки Касте исиамен откуп преку Лескоро рат, прошка е гревонге, според о барвалипа тари Лескири благодат ⁸која чхорѓала изобилно аменге ки секоја мудрост хем разумност, ⁹откринѓа аменге и тајна тари Пли војља, според Пли гудли намера, со одрединѓала ки Лесте, ¹⁰за да те ќерела кога ка пхерѓон о времиа; за да те кхедел ко јек палем ко Христос: са сој тано ки небеса хем сој тано ки пхув ки Лесте, ¹¹ки Касте хем аменда сијем сине избириме баши наследниќа, соске сијем сине определиме англедер е одлукаја Околескири, Кој ќерела са пало совет ки Пли војља, ¹²за да те ова баши пофалба баши Лескири слава, амен, кој веќе англедер надингем амен ко Христос.

¹³Ки Лесте хем тумен, откога шунген о слово е чачипаскоро – о Евангелие баши тумаро спасение – хем откога хем тумен поверујнген, улен запечатиме е Свети Духоја е ветујбаскоро, ¹⁴Кој тано гаранција баши амаро наследство, баши откупување околен кој уле Девлескоро сопственост – баши пофалба Олескере славакири.

Са покоринѓа тело Олескере пре

¹⁵Одолеске хем ме, откога шунѓум баши тумари вера ко Господари ко Исус хем баши тумаро мангипе ко са о света, ¹⁶на ачховава те заблагодаринав баши туменге, спомнибаја тумен ко мле молитве, ¹⁷та о Девел амаре Господарескоро о Исус Христос, о Дат е славакоро, те дел тумен духо таро мудрост хем откровение ко чачикано пенџариба Оле: ¹⁸хем те избистринел о јајкха таро тумаро срце, за да те џанен сави тани и надеж ко Лескоро повикување, кобори о барвалипе таро Лескоро славно наследство ко светие, ¹⁹хем кобор тани пребари Лескири сила ки аменде кој верујнаја според о делујбе тари Лескири моќно сила; ²⁰каскоро делујбе сикаѓале ко Христос, кога ваздинѓале таро муле хем постајнѓале десно Пестар ко небесна тхана, ²¹дур упредер секова началство, хем власт, хем сила, хем господарство хем упредер о секова анав, кова спомнинелапес на само ко акава свето, него хем ко идно.

²²Хем са покоринѓа Леске тело Олескере пре, а Ле постајнѓа баши Шеро упредер о са ки црква, ²³кој тани Олескоро Тело – и полнота Околескири, кој пхерела са ко са.