Romano Prevod Tari Biblija

Galatjajna 6

Ингарен о пхарипа јек јекескере

1Пхрајљален, ако хем да некој пело ко дисаво грево, тумен кој со сијен духовна, поправиненле асавке ко духо таро кротост, ама аракхту тут тена ове туда искушимо. 2Ингарен о пхарипа јек јекескере, хем одолеја ка исполнинен о Закон е Христоскоро!

3Соске, ако некој мислинела декај тано нешто, а нае тано ништо, коркори пес ховавела.

4А секој те испитинел пло дело, па тогаш ка овел пофалба само англи песте, а на англо јавер. 5Соске секој ка ингарел пло пхарипе. 6А кој сикљола таро слово, нека делинел са пле шукарипа околеја, кој учинелале.

7Ма ховавен тумен: о Девел на дозволинела те овел изиграјмо! Соске со о мануш ка посејнел, одова хем ка жнејнел: 8кој сејнела ко пло тело, таро тело ка жнејнел пропаст; а кој сејнела ко Духо, таро Духо ка жнејнел вечно живото.

9Тена ова уморна те ќера шукар, соске ка жнејна ко право време, ако на уморинајамен. 10Одолеске, џикоте исиамен време, те ќера шукар сариненге, а највише околенге, кој припадинена ко амаро семејство ки вера.

О Павле ваќерела баши о обрезиме хем о необрезиме

11Дикхен, козом баре буквенцар пишинѓум туменге ме сопствено вастеја!

12Са окола, кој мангена те ќеренпес важна телоја, ола чхивена тумен те обрезинен тумен, само за да мате овен гониме баши е Христоскоро крсто. 13Соске ни коркори ола, кој обрезиненапес, на пазинена о Закони, а мангена тумен те обрезинен тумен, за да те фалиненпес тумаре телоја.

14А ме сијум дур таро одова те фалинама нешто јавереја, освен ко крсто амаре Господарескоро о Исус Христос, преку Касте о свето тано распнимо баши манге хем ме е светоске! 15Соске ниту о обрезание тано нешто ниту о необрезание, него нево создание.

16Хем сариненге, кој ка слединен акава правило мир хем милост, ки ленде, хем е Девлескоро Израел. 17Ки иднина никој тена досадинелма повише, соске ингарава е Исусескере ране ко мло тело. 18Пхрајљален, и благодат амаре Господарескири о Исус Христос те овел тумаре духоја! Амин!