Пало благодат сијен спасиме

¹Хем тумен, кој сијен сине муле баши тумаре престапиа хем гревиа, ²ко кова живинена сине некогаш според о веко акале светоскоро, според о кнез е воздушно силенгоро – о духо, кој делујнела акана машкар о чхаве тари непокорност. ³Машкар акала, хем аменда живингем некогаш кo амаре телесна страстиа, ќераја сине о похоте е телоскере хем ко помисле хем сијем сине ки природа чхаве е хољакере сар хем о са јавера.

⁴Ама о Девел, Кој тано барвало ко милост, баши Пло баро мангипе колаја замангљамен, ⁵џивде ќерѓамен заедно е Христоја хем амен, кој сијем сине муле баши амаре гревиа – пали благодат сијен спасиме! – ⁶хем Олеја воскреснинѓамен хем Олеја бешаќерѓамен ко небесна тхана, ко Христос Исус, ⁷та, ко поадари веќа те сикавел о пребаро барвалипе тари Пли благодат, според Пло шукарипа ки аменде ко Христос Исус.

⁸Соске пало благодат сијен спасиме, преку вера, хем одова нае тано тумендар коркори – одовај тано Девлестар поклон! ⁹Нае таро дејља, за да те на фалинелпе некој. ¹⁰Уствари, Лескоро дело сијем, создајме ко Христос Исус, баши шукар дејља, кола о Девел спреминѓален англедер, за да те живина ки ленде.

Ови тано амаро мир

¹¹Одолеске спомнинен туменге, дека тумен, кој некогаш сијен сине незнабошциа ко тело, хем ваќерде биобрезиме таро окола, кола со ваќеренапе обрезиме, хем кој тале одова ко тело, пало манушикано дело; ¹²ко одова време сијен сине бизо Христос, дујрарде таро израелско општество, хем туѓа е заветенге таро ветување, бизо надеж хем бизо Девел ко свето. ¹³А акана ко Христос Исус, тумен кој некогаш сијен сине дур, улен паше преку е Христоскоро рат.

¹⁴Соске Ови тано амаро мир, Кој таро дуј ќерѓа јек, хем пељарѓа о преградимо ѕидо, со делинелален сине, ¹⁵хем ко Пло тело уништинѓа о душманлуко хем о закони олескере заповеденцар хем одредбе, хем ќерѓа мир, таро дуј те создајнел ки Песте јек нево мануш, ¹⁶хем солдуј ко јек тело те помиринелен е Девлеја преку о крсто, откога мударѓале упри лесте о душманлуко.

¹⁷Ов ало те проповединел мир туменге, кој сијен сине дур хем мир околенге, кој сине паше: ¹⁸соске преку Лесте, хем акала хем о јавера, исиамен пристап ко Дат ко јек Духо.

О Христос амаро аголно бар

¹⁹Одолеске, тумен на сијен веќе јабанџие хем странциа, него сијен сограѓајна е светиенгере хем о кхерутне е Девлескере, ²⁰надѕидиме упри основа е апостоленгири хем е пророконгири, а о аголно бар тано коркори о Христос Исус, ²¹упри Касте цело стројно состајми зграда бајрола ко свето храми ко Господари, ²²упри Касте хем туменда ко Духо заедно соѕидинена тумен е Девлеске ко живеалиште.