О Христос тано о Шеро

¹Одолеске молинава тумен, ме затворнико ко Господари, те живинен достојно според о повик ко кова сијен повикујме: ²секоле понизностеја хем кроткост, трпение, поднесинен тумен јек јекеја ко мангипа! ³Дикхен те аракхенле о јекипе е Духоскоро ки врска е миреја.

⁴Јек тело хем јек духо, сар со сијен хем тумен повикујме ки јек надеж ко тумаро повик; ⁵јек Господари, јек вера хем јек крштевање; ⁶јек Девел хем Дат сариненгоро, Кој тано упредер о сарине, хем преку сарине хем ко сарине.

⁷А секаске амендар денди тани и благодат според и мерка таро е Христоскоро дари. ⁸Одолеске ваќерелапе:

⁹А „ваздисалило“ – со значинела, јавер него хулило ко телуне тхана тари пхув? ¹⁰Ов Кој хулинѓа, одовај тано Окова исто, Кој ваздисалило упредер о са о небесиа, за да те пхерел са.

¹¹Xем Ов денѓа јек баши апостојља, о јавера баши пророќа; јек баши евангелистиа, а јавера баши пастијра хем учитејља, ¹²за да те усовршиненпес о светие баши о дело е службакоро, баши те градинелпес е Христоскоро Тело, ¹³џи коте сарине на аваја џи ко јекипе е веракоро хем ко пенџариба е Девлескере Чхаве, џи ко совршено мануш, џи ки пхерди мерка е Христоскере барипасте, ¹⁴за да ма те ова веќе чхаве, кој нишинелален хем ингарелален секоја бавлал е наукакири, солеја – о манушикано ховајба хем лукавство – анела џи ко џанде измислиме заблуде.

¹⁵Него, ваќериндор о чачипе мангипаја, амен требела те бајрова ко са – ки Лесте, Кој тано Шеро, о Христос. ¹⁶Олестар цело Тело тано поврзимо хем соединимо ко јек, ко одова начин со секова дело дела поткрепа според јек мерка ко секова оделимо дело; одова ќерела о Тело те бајрол баши пли сопствено наградба ко мангипа.

Неве мануша ко Христос

¹⁷Акава ваќерава хем сведочинава ко Господари, те на живинен веќе сар со џана о народиа ки суета пле гоѓакири, ¹⁸каранлуко иси ки ленгири годи, дујрарде таро е Девлескоро живото, баши о биџандипе кова владинела ки ленде, соске зорале коракоро тано оленгоро срце. ¹⁹Откога нашагеле о чуство, ола хем предајнгепе пес ко румиме буќа, за да те ќерен разна мелалипа е алчностеја.

²⁰А тумен на пенџаргенле аѓар е Христа, ²¹ако шунген баши Олеске хем ако сијен ки Лесте поучиме аѓар, сар сој тано о чачипе ко Исус; ²²ко однос таро тумаро англутно живото, тумен требела те хуљавен тумендар о пурано мануш, кој руминѓовела баши о ховавне страсна желбе, ²³хем те обновинен тумен ко духо тари тумари годи, ²⁴хем те уравен тумен ко нево мануш, кој тано создајмо според о Девел ки правда хем светост е чачипаскоро.

²⁵Одолеске отфрлинен о ховајба хем ‘ваќерен о чачипа секој пле пашеја,’ соске сијем члениа јек јекеја! ²⁶‘Ако сијен хољаме, ма грешинен!’ О кхам те на зајдинел ки тумари холи, ²⁷хем ма ден тхан е бенгеске!

²⁸Кој чорѓа, те на чорел веќе! Пошукар тано те трудинелпес хем те ќерел бути пле вастенцар одова сој тано шукар, за да те шај те дел околеске, кас иси потреба!

²⁹Нисаво билачхо лафи те на икљол таро тумаро муј, него само шукар лафи, баши те изградинен тумен – коте тано потребно, за да те дел благодат е слушателенге.

³⁰Хем ма жалостинен о Свети Дух Девлескоро, Колеја сијен запечатиме баши о диве е избавибаскоро!

³¹Секова ќеркипа, хем холи, хем хољаниба, хем викиба хем хулиба, те овен отстраниме тумендар, секоле билачхипаја. ³²Овен јек јекеске шукар, милостива, опростинен тумен јек јекеја, сар со хем о Девел опростинѓа туменге ко Христос.