Поздрав

¹О Павле хем о Тимотеј, слуге е Христа Исусескере, џи ко са о света ко Христос Исус, кој тане ко Филипи, е надзорниконцар хем е ѓаконенцар: ²благодат туменге хем мир таро Девел амаро Дат хем таро о Господари о Исус Христос.

О Павле благодаринела ки секоја молитва

³Благодаринава ме Девлеске секогаш кога спомнинавама баши туменге; ⁴секогаш ки секоја мли молитва молинаваман баши сариненге туменге радостеја, ⁵баши тумаро учество ко проповедиба о Евангелие таро прво диве џи акана. ⁶Уверимо сијум ко одова, дека Окова, Кој почминѓа о шукар дело ки туменде, ка довршинеле џи ко Диве е Христа Исусескоро.

⁷А хем право тано те мислинале одова баши сариненге туменге, соске сијен ко мло срце сарине тумен, кој сијен соучесниќа манцар ки благодат – сар ко мло пханлипе, аѓар хем ки одбрана хем утврдување о Евангелие. ⁸Соске о Девел тано манге сведоко козом жедно сијум пало сариненде туменде ко осет хем мангипе таро Исус Христос.

⁹Хем одолеске молинаваман тумаро мангипе те овел изобилно са повише хем повише ко пенџариба хем ки секоја бути те разликујнен, ¹⁰за да те шај те испитинен баши одова сој тано пошукар: те овен чиста хем беспрекорна ко Диве е Христоскоро, ¹¹пхерде е плоденцар тари правда, кој тане преку Исус Христос, баши слава хем пофалба е Девле.

Ко било саво начин о Христос проповединелапе

¹²А мангава те џанен, пхрајљален, дека акава со случинелапес манцар поможинѓа бут повише баши те ширинелпес о Евангелие, ¹³аѓар со уло ленге јасно е цело царско стражаке хем са е јаверенге, дека сијум ко пханлипа баши о Христос, ¹⁴хем дека повеќе таро пхрајља ко Господари, охрабриме таро мло пханлипе, осмелиненапес са повише те проповединен бизо дар е Девлескоро слово.

¹⁵Чаче, јек проповединела е Христа таро завист хем мангипа ко препирке, а јавера тари шукар војља; ¹⁶јек таро мангипа, џандипаја дека пашљовава ко пханлипа баши одбрана о Евангелие, ¹⁷а јавера навестинена е Христа таро себичност, на чисто намераја, мислинена те анен манге невоља ко мло пханлипе.

¹⁸Ама со тогаш? Само одова: дека ко секова начин, било дујмујале или искрена, о Христос проповединелапе. Хем радујнавама баши одова, а хем ка радујнама, ¹⁹соске џанава дека акава – преку тумари молитва хем помош таро Духо е Исусе Христоскоро, ка овел манге баши спасение, ²⁰согласно мло зорало уџаќериба хем надеж, дека ко ништо нае те лаџаќерама: ама сар хем секогаш ки цело смелост, аѓар хем акана, о Христос ка возвеличинелпес ко мло тело, било преку живот, или преку мерибе.

Притиснимо таро дуј стране

²¹Соске баши манге живот тано о Христос, а о мериба – придобивка. ²²Ама ако хем поадари живинава ко тело, одова баши манге значинела: плодно бути – хем на џанава со те биринав. ²³Притиснимо сијум таро дуј стране: исима желба те џав манге хем те овав е Христоја, сој тано дур пошукар, ²⁴ама баши туменге тано попотребно те ачховав ко тело.

²⁵Хем целосно уверимо ко одова, џанава дека ка ачховав хем ка продолжинав сариненцар туменцар, баши тумаро напредување хем баши радост ки вера. ²⁶Хем тумари пофалба ко Христос Исус, те овел панда поизобилно ки манде, баши мло повторно ајбе машкар туменде.

Понашинен тумен достојно

²⁷Само понашинен тумен достојно баши е Христоскоро Евангелие, за да те шај ме – било те авав хем те дикхав, било те овав отсутно те шунав баши туменге, дека терѓона цврсто ко јек духо, дека еднодушно боринена тумен заедно баши и вера таро Евангелие, ²⁸хем дека ко ништо на дарана таро противниќа: одовај тано оленге знако баши уништиба, а туменге баши о спасение, хем одова таро Девел, ²⁹соске туменге дендој милост баши о Христа на само те верујнен ки Лесте, него хем те циден баши Леске, ³⁰те овелтумен исто борба, сар со дикхлен ки манде, а хем акана шунена баши манге.