И правда таро Девел, упри основа е веракири

¹Хем аѓар, мле пхрајљален, радујнен тумен ко Господари! Манге нае тано досадно те пишинав туменге исто, а туменге ка служинел баши тумари безбедност.

²Пазинен тумен таро џуќела, пазинен тумен таро билачхе работниќа, пазинен тумен таро ховавно обрезание! ³Соске, амен сијем о чачутно обрезание; амен кола служинаја е Девлескере Духоја хем фалинајамен ко Христос Исус, а на надинајамен ко тело, ⁴иако хем меда шај те доверинама хем е телоске. Ако некој јавер мислинела дека шај те надинелпес ко тело, одова ме, панда повише: ⁵обрезимо сијум ко овтото диве, таро израелско родо сијум, таро е Венјаминескоро племе, Евреин таро Евреа; спрема о Закони - фарисеј; ⁶спрема са ме силаја - гонители е црквакоро; спрема и правда е Законескири сијум сине бизо те фалинел нешто.

⁷Ама одова со сине манге некогаш придобивка, одова рачунинѓум баши загуба баши о Христос. ⁸Ки суштина, ме хем акана рачунинава са баши загуба баши о преважно пенџариба е Христа Исусе, Мло Господари, баши Касте нашаѓум са хем са рачунинава баши отпад, за да те придобинав е Христа ⁹хем те аракхљаѓовав ки Лесте, на мле правдаја, која авела таро Закони; него пали и правда, која авела преку и вера ко Христос: и правда таро Девел упри основа е веракири, ¹⁰за да те пенџарав Оле, хем и сила таро Олескоро воскресение, хем учество ко Олескоро цидиба, те овав слично сар Лесте ко Лескоро мерибе ¹¹та несар те доресав џи ко воскресение таро муле.

Прастава ки цел баши награда

¹²На ваќерава дека веќе доресљум или дека веќе аљум џи ко совршенство – него настојнава те доресав, соске хем манда о Христос доресља. ¹³Пхрајљален, ме панда на мислинава дека доресљумле! ¹⁴Ама сепак ќерава јек: бистрава окова сој тано пали манде, а дикхава ко окова сој тано англи манде; прастава ки цел: баши награда ко упруно повик таро Девел ко Христос Исус.

¹⁵Хем аѓар, кола сијем совршена мислинаја аѓар; ако тумен мислинена хем нешто појавер, о Девел ка откринел туменге хем одовада. ¹⁶Ама пало окова, џи ко кова дореслем, според о исто правило хем те ова едномислена!

Амаро жителство тано ки небеса

¹⁷Углединен тумен ки манде, пхрајљален, хем дикхен околенде, кој џана аѓар, сар со хем тумен иситумен пример ки аменде! ¹⁸Соске бут џене, баши каске со ваќерава сине туменге бут пути, а акана ваќерава хем асвенцар, џана сар непријатејља баши о крсто е Христоскоро. ¹⁹Ленгоро крајо тано уништиба; оленгоро девел тано о воги; оленгири слава тани ки ленгири лаџ; ола мислинена само баши акаја пхув.

²⁰А амаро жителство тано ки небеса, котар хем очекујнаја е Спасителе, о Господари о Исус Христос, ²¹Кој ка преобразинел амаро слабо хем смртно тело, те собразинелпе олескере славно телоја, според о делујбе тари Олескири сила, колаја шај те покоринел са тели Песте.