Ма секиринен тумен баши ништо

¹Одолеске, пхрајљален мле мангљален хем мангле, мло радост хем венцо, терѓовен аѓар цврсто ко Господари, мангљален!

²Молинава е Еводија хем молинава е Синтихија те овен едномислена ко Господари. ³Оја, молинаватут хем тут, верно амал, поможин олен, соске заедно манцар трудингепе ко проповедиба о Евангелие, хем е Климентеја, хем е јавере соработниконцар, каскере анава тане ко Лил е Животоскоро.

⁴Радујнен тумен секогаш ко Господари! Палем ваќерава: радујнен тумен! ⁵Тумари кротост те овел пенџарди са е народонге! О Господари тано паше.

⁶Ма секиринен тумен баши ништо, него ко са преку и молитва хем молба е благодарностеја искажинен тумаро родиба англо Девел! ⁷Хем е Девлескоро мир, со накхела упредер секоја годи, ка запазинел тумаре срциа хем тумаре мисле ко Христос Исус.

⁸Ко крајо, пхрајљален, са сој тано чачикано, сој тано чесно, сој тано праведно, сој тано чисто, сој тано љубезно, сој тано ко шукар гласо – ако тано несаво шукарипа, ако тани несави пофалба – мислинен баши одова! ⁹Окова со сиклилен, хем приминген, хем шунген, хем дикхлен ки манде – ќерен одова, хем о Девел е мирескоро ка овел туменцар!

Са шај преку Христа

¹⁰Радујсалиљум бут ко Господари, соске акана најпосле, оживинген тумари грижа баши манге, тумен хем иначе грижинген тумен сине, ама на синетумен прилика. ¹¹На ваќерава одова баши о нанипа, соске сиклиљум те овав задоволно одолеја ко со сијум. ¹²Џанава те живинав хем ко нанипа, џанава хем ко изобилство, сикло сијум ко са хем ко свашто: те овав чало хем бокхало, те овав ко изобилство хем ко нанипа. ¹³Са шај преку Христа, кој делама сила.

¹⁴Него шукар ќерген, со лелен учество ко мле невоље. ¹⁵А џанена хем туменда, Филипјајна, дека ко почеток ко проповедиба о Евангелие, кога гељум манге тари Македонија, нијек црква на сине манцар ко дејбе хем примибе, освен единствено тумен. ¹⁶Тумен бичхаген манге ко Солун, јек дуј пути, баши мли потреба.

¹⁷На сар те родава бакшиши, него родава о плоди со умножинелапес ки тумари сметка. ¹⁸Приминѓум са хем исима са ко изобилство. Пхердо сијум откога приминѓум таро Епафродит со бичхаген манге – благопријатно мирис, жртва пријатно благоугодно е Девлеске.

¹⁹А мло Девел ка исполнинел славно секоја тумари потреба, според Пло барвалипа – ко Христос Исус. ²⁰А амаре Девлеске, хем Дат, слава ко са о вејќа, амин!

Поздравиа

²¹Поздравинен секоле вернико ко Христос Исус! Поздравинена тумен о пхрајља, кој тане манцар. ²²Поздравинена тумен са о светие, а особено окола таро e Кесарескоро кхер.

²³И благодат амаре Господарескири о Исус Христос те овел тумаре духоја. Амин!