Поздрав

¹О Павле, о апостоли е Исусе Христоскоро преку е Девлескири војља хем о пхрал о Тимотеј, ²џи ко света хем верна пхрајља ко Христа, ко Колос: о благодат туменге хем о мир таро Девел амаро Дат.

На ачховаја те молинамен баши туменге

³Благодаринаја е Девлеске, хем Дат амаре Господареске о Исус Христос, молинајамен секогаш баши туменге, ⁴соске шунгем баши тумари вера ко Христос Исус хем баши о мангипа, кова иситумен ко са о светие. ⁵Баши о надеж, која аракхелапе баши туменге ки небеса, баши која шунген порано таро чачикано слово таро Евангелие, ⁶кова ало ки туменде, сар хем ко цело свето, хем плодно бајрола сар хем ки туменде, таро одова диве кога шунген хем запознајнген е Девлескири благодат ко чачипе, ⁷сар со сиклилен таро Епафрас, амаро мангло соработнико ки служба, кој тано верно е Христоскоро служители баши туменге, ⁸кој известинѓамен баши тумаро мангипе ко Духо.

⁹Одолеске хем амен таро одова диве кога шунгем одова, на ачховаја те молинамен баши туменге хем те рода те исполнинен тумен пенџарибаја тари Олескири војља ки секоја мудрост хем духовно те хајљовен, ¹⁰аѓар со те џан достојно баши о Господари хем те овен Олеске угодна ко са; за да те овен плодна ко секова шукар дело хем за да те бајрон ко пенџариба е Девле; ¹¹те зајакнинен ки секоја сила, според е силаја Олескере славакири, баши секоја непоколебливост хем трпение; радостеја ¹²те благодаринен е Девлеске, Кој оспособинѓамен баши учество ко наследство е светиенге ки светлина.

¹³Ов избавинѓамен тари власт е темницакири хем преселинѓамен ко Царство Пле мангле Чхавескоро, ¹⁴ки Касте исиамен откуп, преку Лескоро рат, опростување е гревонге.

Сај тано создајмо преку Лесте хем баши Леске

¹⁵Ови тано образ таро невидливо Девел, Првобијандо таро секова создание, ¹⁶соске ки Лесте тано создајмо са сој тано ки небеса хем ки пхув, видливо хем невидливо, било престојља, или господарства, или началствиа, или властиа, сај тано создајмо преку Лесте хем баши Леске.

¹⁷Хем Ови тано англедер о са хем сај ки Лесте пханло. ¹⁸Ови тано хем Шеро е Телоскоро, е Црквакоро. Ови тано почеток, Првобијандо таро муле, за да те овел Прво ко са, ¹⁹соске е Дадеске сине угодно ки Лесте те вселинелпе целосно полнота, ²⁰хем преку Лесте те помиринел ки Песте са сој тано ки пхув или ко небо, те ќерел мир преку о рат Олеске ко крсто.

²¹Хем тумен, кој сијен сине некогаш јабанџие хем непријатејља ко тумаро мислење хем билачхе дејља, ²²акана помиринѓа тумен преку о мериба ко Олескоро манушикано тело, за да те икавел тумен англи Песте: света, непорочна хем бизо те овен крива, ²³само ако ачховена ки вера заосновиме хем цврста хем непоколеблива ки надеж таро Евангелие, кова шунгенле, ковај тано проповедимо баши цело создание тело небо хем ко кова ме, о Павле, уљум леске служители.

И тајна која сине гаравди

²⁴Акана радујнавама ко мло цидиба баши туменге – хем ко мло тело допхерава одова со недостасинела е Христоскере мукенге, баши Олескоро тело, ковај тани и Црква, ²⁵ки која ме хем уљум служители, според е Девлескоро управителство; сој манге тано дендо баши туменге, за да те исполнинав е Девлескоро слово; ²⁶и тајна, која сине гаравди веконцар хем поколениа, а која тани открими акана Олескере светиенге, ²⁷ки Касте о Девел мангла те јавинел сар тани барвали и слава акале тајнакири машкар о народиа: о Христос ки туменде, надеж е славаке.

²⁸Амен проповединаја Оле, опоменибаја секоле мануше хем сикаваја секоле мануше ки цело мудрост, за да те претставинале секоле мануше совршено ко Христос Исус. ²⁹Одолеске трудинавама хем боринавама според Олескере делотворно силаја, која делујнела силно ки манде.