Поздрав

¹О Јаков, слуга е Девлескоро хем е Господарескоро о Исус Христос, џи ко дешудуј распрсниме племиња, поздрав.

Блажено тано о мануш, кој поднесинела искушение

²Рачуниненла баши чисто радост мле пхрајљален, кога ка перен ко разна искушениа, ³џандипаја дека о испитување тумаре веракоро ќерела трпение! ⁴А о трпение нека овеле совршено дело, за да те овен совршена хем потполна, бизо ништо те на фалинел туменге.

⁵Ако некастар тумендар фалинела мудрост, нека родел таро Девел, Кој дела сариненге изобилно хем бизо укор – хем ка делпес леске. ⁶Ама те родел вераја, бизо нисаво сомнение; соске окова кој сомнинелапе тано слично сар морско брани кас со и бавлал вазделале хем теринелале. ⁷Асавко мануш те на мислинел дека ка приминел нешто таро Господари. ⁸О мануш улавде душаја нае тано стабилно ко са пле друмиа.

⁹О бедно пхрал те фалинелпес ко пло барипе, ¹⁰а о барвало ки пли понизност, соске ка накхел сар и лулуди е чајратар. ¹¹Соске о кхам иклило баре татипаја хем шуќарѓа и чар, па лакири лулуди препели хем нашавдило о шужипа таро олакоро изглед. Аѓар хем о барвало ка шуќол ко пле друмиа.

¹²Блажено тано о мануш, кој поднесинела искушениe, соске кога ка овел испитимо, ка приминел венцо е животоскоро, со о Девел ветинѓале околенге, кој мангенале.

Секова шукар дари таро Девели тано

¹³Нијек, кој тано искушимо те на ваќерел: „О Девел искушинелама.“ Соске, о Девел на искушинелапе таро билачхипе, хем Коркори никас на искушинела. ¹⁴Него, секас искушинела олескири сопствено похота, која влечинелале хем ховавелале. ¹⁵Пало одова и похота зачнинела хем бијанела грево, а о ќердо грево бијанела мериба.

¹⁶Ма заблудинен тумен, мангљален мле пхрајљален. ¹⁷Секова шукар дари хем секова совршено бакшиши авела упралдан, таро Дат е светлинакоро, ки Касте нане измене, ниту сенка тари промена. ¹⁸Ов бијанѓамен според Пли војља преку о Слово е чачипаскоро, за да те ова сар јек врста прва плодиа машкар Олескере созданиа.

Шунен хем иќерен о Слово

¹⁹Џанен акава, мангле пхрајљален: секова мануш те овел брзо ко шуниба, а бавно ко лафиќериба, хем бавно ки холи, ²⁰соске е манушескири холи на ќерела правда англо Девел. ²¹Одолеске фрден тумендар: секова мелалипа, хем о последно окова со ачхило е билачхипаскоро, хем приминенле е кроткипаја ки туменде о насадимо Слово, кова шај те спасинел тумаре душе.

²²Ама овен окола со иќерена о Слово, на само со шунена, кој ховавенапе пес. ²³Соске, кој шунела о Слово, а на иќерелале, сличној тано ко мануш, кој дикхела пло природно муј ки ајна; ²⁴ка дикхелпес хем ка џал песке, хем одма бистрела саво сине. ²⁵А кој ка задикхелпес ко совршено закони е слободакоро хем ачхола ки лесте, на сар бистердо слушатели, него сар чачикано окова со иќерела, ов ка овел блажено ко одова со ќерела.

²⁶Ако некој мислинела дека тано девликано, а на контролиринела пли чхип, него ховавела пло срце, олескоро девлипа тано суетно. ²⁷Акавај тано чисто хем бивалкајмо девлипа англо Девел хем о Дат: те овен посетиме о чороле чхаве хем о удовице ко оленгере невоље, хем коркори те пазинелпес пес непорочно таро свето.