Јаков 4

Родена ама на добинена

¹Котар тане о војне хем котар тане о борбе машкар туменде? На авена ли таро тумаре страсна желбе, со маренапес ко тумаре члејна? ²Мангена хем наетумен, мударена хем завидинена, хем нашти те доресен; марена тумен хем воинена. Наетумен, соске на молинена. ³Родена, ама на добинена, соске родена погрешно, за да те трошинен ко тумаре страсна желбе.

⁴Прељубниќа, на џанена ли дека о амалипа е светоја тано душманлуко против о Девел? Хем аѓар, кој мангела те овел амал е светоја овела душмани е Девлеске. ⁵Или мислинена ли дека о Свето Писмо ваќерела ко чучо: ‘Баре силаја мангелале е духо кој живинела ки аменде‘? ⁶Ама дела побари благодат. Одолеске ваќерела:

Авен паше тумен ко Девел

⁷Хем аѓар, покоринен тумен е Девлеске; а противинен тумен е бенгеске хем ка нашел тумендар. ⁸Авен паше тумен ко Девел, хем Ов ка авел паше ки туменде; исчистинен тумаре васта, грешниќа, хем очистинен тумаре срциа, мануша улавде душаја! ⁹Овен нажалиме, тугујнен, хем ровен: тумаро асајбе нека претворинелпес ки туга, а о радост ко жалост! ¹⁰Овен понизна англо Господари, хем Ов ка ваздел тумен!

¹¹Ма ќерен билачхе лафи јек јекеја, пхрајљален; кој ќерела лафи против таро по пхрал или судинелале пе пхрале, ќерела лафи против о закони хем судинела е законе. А ако судинеја о закони, на сијан извршители е законескоро, него олескоро судија. ¹²Само јек тано Законодавцо хем Судија, Кој шај хем те спасинел хем те уништинел. А кој сијан ту, со осудинеја тле паше?

Ма фалинен тумен ко тумаро барипе

¹³Шунен акана тумен, кој ваќерена: „Авдије или тајса ка џа ки окоја или одоја диз, хем адари ка ачхова јек берш, хем ка ќера трговија хем ка спечалина,“ ¹⁴тумен кој на џанена со ка овел тајса: соске, сој тано тумаро живото? Тумен сијен пареа, која јавинелапес ко моменти, хем пало одова нашаѓовела.

¹⁵Место те ваќерен: „Ако о Господари мангела, ка живина хем ка ќера акава или окова,“ ¹⁶тумен акана фалинена тумен ко тумаро барипе. Секоја асавки фалба тани билачхе. ¹⁷Хем аѓар, кој џанела те ќерел шукар, а на ќерела, грево тано олеске.