Јаков 5

Е барваленге

¹Шунен акана, тумен о барвале, ровен хем викинен упро невоље, со авена ки туменде. ²Тумаро барвалипе кирнило, хем молциа хале тумаре шеја. ³Тумаро злато хем сребро баши ‘рѓа, хем ленгири ‘рѓа ка овел сведоштво против туменде, хем сар јаг ка глтинел тумаре тејља. Кхединген барвалипе ко последна диве. ⁴Еќе, и плата е работниконгири, кој жненге тумаре ниве, со тумен со кратинген лендар, пиштинела хем о пиште е жетваренгере але џи ко кана е Господареске упредер о Силе.

⁵Тумен живинген ки пхув луксузно хем баши задоволствиа, параген тумаре срциа, сар баши о диве чхинибаске. ⁶Осудинген, мударген е праведнико; хем ов на противинелапес туменге.

Ма ден тумен совли

⁷Хем аѓар, овен трпелива, пхрајљален, џи ко е Господарескоро ајбе! Еќе, о земјоделцо уџарела о скапоцено род тари пхув, уџарела трпеливо џи коте на приминела о рано хем о покасно бршим. ⁸Уџарен трпеливо хем тумен, зојраќерен тумаре срциа, соске тано паше е Господарескоро ајбе. ⁹Ma ќерен лафи со на ваљани, пхрајљален, јек против јавер, за да ма те овен осудиме: еќе, о Судија терѓола англо удар.

¹⁰О билачхе цидиба хем о долготрпение ленлен баши пример, пхрајљален, е пророкон, кој ќерена сине лафи е Господареске ко анав. ¹¹Еќе, блажена ваќерајален околен, кој претрпинге. Шунген баши о трпение е Јовескоро, а дикхлен сар о Господари завршинѓа одова; соске о Господари тано бут милостиво хем сочуствително.

¹²А англедер о са, мле пхрајљален, ма асоќерен тумен ни ко небо ни ки пхув, ниту дисаве јавере совљаја! Тумарo „оја“ те овел „оја“, а тумаро „на“ – „на“, за да ма те перен тело судо.

Молинен тумен јек јавереске

¹³Цидела ли некој машкар туменде, нека молинелпес; веселној ли тано некој, нека фалинел е Девле. ¹⁴Насвалој ли некој машкар тумендар, нека викинел е старешинен тари црква, хем ола нека молиненпес упри лесте, хем нека помазиненле таро ујле маслинкенгоро ко анав е Господареске, ¹⁵хем и молитва е веракири ка спасинел е насвале хем о Господари ка вазделе, хем ако ќерѓа гревиа, ка овен леске опростиме.

¹⁶Хем аѓар, исповединен тумаре гревиа јек јавереске хем молинен тумен јек баши јавереске, за да те сасќовен! И молитва со делујнела е праведникоскири исила бари сила. ¹⁷О Илија сине мануш ки природа исто сар хем амен, хем молинѓапес молитваја те на овел бршим хем на пело бршим ки пхув трин берш хем шов масек. ¹⁸Хем палем молинѓапес, па о небо денѓа бршим, хем и пхув денѓа пло плоди.

Ако некој иранела е грешнико

¹⁹Мле пхрајљален, ако некој тумендар циделапес таро чачипе, хем некој иранелале, ²⁰нека џанел дека окова, кој ка иранел е грешнико таро олескоро заблудимо друмо, ка спасинел олескири душа таро мериба хем ка учхарел бут гревиа.