Овен стално ки молитва

¹О Господајра, ќерен е робонге сој тано праведно хем справедливо, џандипаја дека хем тумен иситумен Господари ки небеса.

²Овен стално ки молитва, џангавде ки лате хем благодарна. ³Молинен тумен панда хем баши аменге, за да те пхравел о Девел о вудар е словоскоро хем за да те навестина и тајна е Христоскири, баши каске сијум хем ко пханлипе, ⁴хем те откринавла аѓар, сар со требела те ваќерав.

⁵Постапинен мудро спрема окола авријалдан, користинен о време. ⁶Тумаро лафи секогаш те овел тано љубезно, зачинимо лондеја, за да те џанен сар требела те одговоринен секаске.

Поздравиа

⁷Баши манге ка ваќерел туменге са о Тихик, мангло пхрал хем верно слуга хем соработнико ко Господари, ⁸кас со бичхавава ки туменде баши одолеске, за да те сикљон сар сијем амен хем те утешинел тумаре срциа, ⁹заедно е верно хем мангло пхрал о Онисим, кој тано тумендар. Ола ка сопштинен сар тано акате.

¹⁰Поздравинела тумен о Аристарх, мо амал ки темница, хем о Марко, о унуко е Варнаваскоро, баши касте приминген упатства; ако авела ки туменде приминенле, ¹¹хем о Исус, ваќердо Јуст. Таро обрезиме акалај единствена, кој поможиненама баши е Девлескоро Царство хем кој сине манге утеха. ¹²Поздравинела тумен тумаро сонароднико о Епафрас, слуга е Христа Исусескоро, кој секогаш боринелапес туменге ко молитве, за да те терѓовен совршена хем пхердо увериме ки цело е Девлескири војља. ¹³Сведочинава баши леске дека исиле баро прастајба баши туменге, хем баши окола ки Лаодикија, хем баши окола ко Ерапол. ¹⁴Поздравинела тумен о мангло доктори о Лука, хем о Димас.

Последна поздравиа

¹⁵Поздравинен е пхрален ки Лаодикија; хем о Нимфан хем олескири кхерутни црква.

¹⁶Кога ка читинелпес акава послание ки туменде, погрижинен тумен те читинелпес хем ки Лаодикијско црква! А окова тари Лаодикија, читинен хем туменда!

¹⁷Ваќерен е Архипеске: „Пазин и служба, која приминѓанла ко Господари, те исполнинела!“

¹⁸Поздрав мле, Павлескере, вастеја. Спомнинен туменге баши мло пханлипе. О благодат туменцар!