Брако хем развод

¹Хем уштило одотхаре хем ало ко предејља ки Јудеја, тари окоја страна е Јорданестар; хем палем о народо придружинѓапес Леске, а Ов поучинелален сине, според Пло обичај,

²хем але Леске о фарисеа хем пучлеле, за да те искушиненле: „Дозволимој ли тано е ромеске те мукел е ромња?“

³А Ов одговоринѓа ленге хем ваќерѓа: „Со заповединѓа туменге о Мојсеј?“

⁴Ола ваќерге: „О Мојсеј дозволинѓа те пишинелпес лаке разводно писмо хем те мукелпес.“

⁵Ама о Исус ваќерѓа ленге: „Баши тумаро кораво срце – ов пишинѓа туменге одоја заповед. ⁶Ама, ко почеток таро создавање, о Девел ‘ќерѓален: мурш хем џувли. ⁷Одолеске о мануш ка мукел пе даде хем пе даја хем ка прилепинелпес уза ки пи ромни; ⁸хем солдуј џене ка овен јек тело.’ Хем аѓар, нае тане веќе дуј – а јек тело. ⁹Хем аѓаре, о Девел со соедининѓа, о мануш те на раздвојнел.“

¹⁰Хем кхере, о учениќа палем пучлеле баши одова. ¹¹А Ов ваќерѓа ленге: „Кој ка мукел пе ромња хем женинелапес јавераја, ќерела прељуба спрема лате. ¹²Хем ако ој мукела е роме хем женинелапес јавереске, ќерела прељуба.“

¹³Хем аненајне Леске чхавен, за да те допринелен, а о учениќа браниненален сине.

¹⁴А кога о Исус дикхља одова, на осетинѓа фино, хем ваќерѓа ленге: „Мукен е чхавен те авен ки Манде; ма бранинен олен; соске асавкенге припадинела е Девлескоро Царство! ¹⁵Чаче ваќерава туменге, кој на приминела е Девлескоро Царство сар тикно чхаво, нае те кхувел ки лесте.“ ¹⁶Хем гушинѓален хем благословинѓален, чхиѓа пе васта упри ленде.

О барвало чхаво

¹⁷Хем кога икљола сине ко друмо, некој прастандило, пело ко кочиа англи Лесте хем пучљале: „Шукар Учителе, со те ќерав, за да те наслединав вечно живото?“

¹⁸А о Исус ваќерѓа леске: „Соске ваќерејаман шукар? Никој нае тано шукар освен јек Девел. ¹⁹Џанеја о заповедиа: ‘Ма мудар! Ма ќер прељуба! Ма чор! Ма сведочин ховавно! Ма ќер измама! Поштојн те даде хем те даја!’“

²⁰Ама ов одговоринѓа Леске: „Учителе, са одова пазинѓумле таро мло тернипе.“

²¹А о Исус дикхљале, замангљале, хем ваќерѓа леске: „Јек фалинела туке: џа, бикин са со иситут, хем де е чороленге хем ка овелтут барвалипе ко небо! Хем ава, ле о крсто хем слединма.“

²²А ов растужинѓапе таро одова лафи хем гело песке жалибаја, соске синеле бут имоти.

²³Хем о Исус дикхља наоколу хем ваќерѓа ленге Пле учениконге: „Кобор пхаро ка кхувен о барвале е Девлеске ко Царство.“

²⁴А о учениќа чудингепес таро Олескере лафиа.

Ама о Исус палем леља те ќерел лафи хем ваќерѓа ленге: „Чхавален, кобор тано пхаро те кхувен е Девлеске ко Царство, окола со надиненапес ко барвалипе! ²⁵Полокхој тано е камилаке те накхел машкар е сувјакере кана отколку о барвало те кхувел е Девлеске ко Царство!“

²⁶А ола зачудингепес панда повише, ваќерибаја јек јавереске: „Тогаш кој шај те спасинелпес?“

²⁷О Исус дикхљален хем ваќерѓа ленге: „Баши о мануша одовај тано невозможно, ама е Девлеске нае тано; соске баши о Девел сај тано можно!“

²⁸О Петар почминѓа те ваќерел Леске: „Дик, амен муклем са хем џаја пали Туте!“

²⁹О Исус пак одговоринѓа хем ваќерѓа: „Чаче ваќерава туменге: нае никој кој ка мукел кхер или пхрален, или пхејнен, или даја или даде, или чхавен, или ниве, баши Манге хем баши о Евангелие, ³⁰а те на приминел, акана шелкратно, ко акава време: кхера хем пхрајља хем пхејна, хем даја хем чхаве хем ниве, заедно е гонибаја – а ко идно веко: вечно живото. ³¹Ама бут џене прва ка овен последна, а о последна – прва.“

³²А кога сине ко друмо уклиндор ко Ерусалим, о Исус џала сине англи ленде, хем чудиненапес сине; а окола кој џана сине пали Лесте дарана сине. Хем палем кхединѓа е Дешудује Џенен хем почминѓа те ваќерел ленге со ка случинелпес Леске: ³³“Еќе, џаја упре ко Ерусалим хем о Манушикано Чхаво ка овел предајмо е главно свештениконге хем е книжниконге хем ка осудиненле ко мерибе, хем ка предајненле е народонге со верујнена ко бут девејља; ³⁴хем ка асанле, ка чхунгаренле, ка камшикујненле хем ка мударенле, а Ов пало трин диве ка воскреснинел.“

³⁵Хем але Леске о Јаков хем о Јован, е Заведескере чхаве, хем ваќерге Леске: „Учителе, мангаја те ќере аменге со ка рода Тутар.“

³⁶Ов пучљален: „Со мангена те ќерав туменге?“

³⁷Ола пак ваќерге Леске: „Де амен те беша јек тари десно, а јек тари лево, узо Туте ки Тли слава!“

³⁸А о Исус ваќерѓа ленге: „На џанена со родена! Шај ли те пијенла и чаша со Ме пијавала или те крстинен тумен е крстибаја колеја Ме крстинавама?“

³⁹Ола одговоринге Леске: „Шај!“

Ама о Исус ваќерѓа ленге: „Ка пијенла и чаша со Ме пијавала хем ка овен крстиме е крстибаја колеја Ме крстинавама; ⁴⁰ама те бешелпе тари десно или тари лево уза Манде, одова на давале Ме, а ка делпес околенге, баши каске тано спремимо.“

⁴¹А о Деш Џене кој шунге, почминге те хољанен против о Јаков хем о Јован. ⁴²Ама о Исус повикујнѓален ки Песте хем ваќерѓа ленге: „Џанена дека окола, кој рачуниненапес баши владетејља е народонгере – господаринена упро ленде; хем дека оленгере о баре исилен власт упро ленде. ⁴³Ама машкар туменде нае тано аѓаре; а кој мангела те овел баро машкар туменде нека овел туменге слуга! ⁴⁴А кој мангела те овел прво машкар туменде, нека овел слуга сариненге, ⁴⁵соске хем о Манушикано Чхаво на ало те служинен Леске, него те служинел хем те дела Пли душа баши откуп буте џененге!“

О Исус сасќарела е короле о Вартимеј

⁴⁶Хем але ко Ерихон. А кога икљола сине таро Ерихон, Пле учениконцар хем баре гужваја, о Вартимеј, е Тимејескоро чхаво, короло хем мангела песке сине девленге, бешела сине узо друмо. ⁴⁷Хем штом шунѓа дека тано одова о Исус Назарецо, почминѓа те викинел хем те ваќерел: „Исусе, чхаво Давидескоро, смилујнтут манге!“

⁴⁸А бут џене заканиненапес сине леске те ќутинел, ама ов викинела сине панда посилно: „Давидескоро Чхаво, смилујнтут манге!“

⁴⁹О Исус ачхило хем ваќерѓа: „Викиненле!“

Хем повикујнгеле е короле хем ваќерге леске: „Ма дара! Ушти, викинелатут!“

⁵⁰А ов фрдинѓа пли наметка, рупинѓа хем ало ко Исус.

⁵¹О Исус палем ваќерѓа леске: „Со мангеја те ќерав туке?“

А о короло одговоринѓа Леске: „Учителе, те дикхав!“

⁵²Тогаш о Исус ваќерѓа леске: „Џа туке – ти вера спасинѓатут!“ Хем одма дикхља хем цидинѓа пали Лесте, пало е друмоја.