О Јуда гело ко првосвештениќа за да те предајнеле

¹А сине дуј диве џи ки Пасха хем џи ко празнико е бизоквасеценгере маре. Хем о главна свештениќа хем о книжниќа родена сине сар те астаренле ко ховајба хем те мударенле, ²ама ќерена сине лафи: „На ко празнико, за да ма те бунинелпес о народо.“

³Хем кога сине ки Витанија, ко кхер е Симонеске о лепрозно, џи коте сине пружимо уза ки софра, али јек ромни, која синела чаро таро алабастер, чисто скапоцено нардово миро; ој пхагља о чаро таро алабастер хем чхорѓа о миро упро Олескоро шеро.

⁴А некој на согласинелапе сине, ваќерибаја машкар песте: „Соске те растуринелпе аѓар о миро! ⁵Уствари, о миро шај сине те овел бикимо баши повише таро тришел денарии хем те делпес е чороленге!“ Хем леле те ќерен лафи против лате.

⁶Ама о Исус ваќерѓа: „Мукенла! Соске досадиненала? Ој ќерѓа шукар дело Манге. ⁷Соске е чоролен иситумен секогаш туменцар, хем шај те ќерен шукар кога ка манген; а Манде наетумен секогаш. ⁸Ој ќерѓа со шај сине; помазинѓа предвреме Мло тело баши парубаске. ⁹Хем чаче ваќерава туменге, коте хем да те овел проповедимо о Евангелие, ко цело свето, ка раскажинелпес хем со ќерѓа ој, баши лакоро спомен.“

¹⁰Хем о Јуда Искариотски, јек таро Дешудуј Џене, гело ко првосвештениќа, за да те предајнеле ленге. ¹¹А ола, кога шунге, радујнгепес хем обечинге леске те денле сребрениќа. Хем родела сине шукар моменти, за да те предајнеле.

И последно вечера

¹²А ко прво диве ко бизоквасеценгере маре, кога чхинена сине баши Пасха, Олескере учениќа ваќерге Леске: „Коте мангеја те џа хем те спремина баши те ха и Пасха?“

¹³Бичхаѓа дујен таро Пле учениќа хем ваќерѓа ленге: „Џан ки диз хем ка аракхел тумен мануш, кој ингарела пани ко букали. Џан пали лесте ¹⁴хем коте ка кхувел, ваќерен е домакинеске: ‘О учители пучља: „Коте тани Мли соба, коте ка хавла и Пасха Мле учениконцар?“’ ¹⁵Хем ов ка сикавел туменге бари собa ко упруно кати, буљарди, спремими; чхивен аменге отхе те ха!“

¹⁶Хем Олескере учениќа иклиле хем геле ки диз, хем аракхле сар со Ов ваќерѓа ленге, па спреминге и Пасха.

¹⁷А кога ратило, ало е Дешудује Џененцар. ¹⁸Хем кога сине пружиме узи софра хем хана сине, о Исус ваќерѓа ленге: „Чаче ваќерава туменге, јек тумендар – кој хала Манцар – ка предајнелман.“

¹⁹Ола растужингепе хем почминге те ваќерен Леске јек по јек: „Те на сијум ме?“ А јавер: „Дали ме?“

²⁰А Ов ваќерѓа ленге: „Јек таро Дешудуј Џене кој болела Манцар ки чинија. ²¹О Манушикано Чхаво џала песке, сар сој тано пишимо баши Леске; ама ќерко одоле манушеске, преку касте о Манушикано Чхаво ка овел предајмо. Пошукар би овела леске одоле манушеске, те на бијанѓовел. ²²Хем кога хана сине, леља маро, благословинѓа, пхагљале, хем разделинѓа ленге: „Лен, хан, акавај тано Мло тело.“

²³Хем леља и чаша, заблагодаринѓа хем денѓала ленге; хем сарине пиле олатар. ²⁴Хем ваќерѓа ленге: „Акавај тано Мло рат е Неве Заветескоро, кова чхорѓола баши буте џененге. ²⁵Чаче ваќерава туменге: нае веќе те пијав таро е лозакоро плоди џи ко одова диве, кога ка пијав нево е Девлеске ко Царство.“

Молитва ки Гетсиманија

²⁶Хем откога гиљаге гили, иклиле ки Маслинова Гора.

²⁷Хем о Исус ваќерѓа ленге: „Сарине ка соблазинен тумен, соске тано пишимо:

‘Ка кхував е Пастире,
хем о бакхре ка разнашен.’

²⁸А пало Мло воскресение, ка џав англедер туменде ки Галилеја.“

²⁹А о Петар ваќерѓа Леске: „Ако хем сарине соблазниненапес, ама ме – на.“

³⁰Хем о Исус ваќерѓа леске: „Чаче ваќерава туке, дека ту авдије, ки акаја рат, англедер о башно те башел дуј пути, трин пути ка одречинетут Мандар.“

³¹Ама ов панда поупорно ваќерела сине: „Ако требела хем те мерав Туја, нае те одречинама Тутар!“ Хем сарине ваќерена сине исто.

³²Хем але џи ко тхан ко анав Гетсиманија, хем ваќерѓа ленге Пле учениконге: „Бешен акате, џи коте молинавама.“

³³Хем леља Пеја: е Петре, е Јакове хем е Јоване, тужнисалило, хем почминѓа хор те вознемиринелпес. ³⁴Хем ваќерѓа ленге: „Мли душа тани нажалими џи ко мериба; ачховен акате хем бешен пазинен!“

³⁵Хем гело хари подур, пело ки пхув хем молинелапе сине – ако тано можно – те накхеле одова саати, ³⁶хем ваќерела сине: „Абба, Мо Дат! Сај тано можно баши Туке. Циде Мандар акаја чаша! Ама на сар Ме со мангава, него сар Ту!“

³⁷Хем ало хем аракхљален сар совена, хем ваќерѓа е Петреске: „Симоне, совеја ли! Нашти ли сине те ове џангавдо јек саати! ³⁸Бешен пазинен хем молинен тумен, за да ма те перен ко искушение! О духо мангела, ама о тело тано слабо.“ ³⁹Хем палем гело хем молинѓапес, ваќерибаја и исто молитва. ⁴⁰Кога иранѓапес, палем аракхљален сар совена, соске о јајкха ленгере сине пханљона хем на џанена сине со те одговоринен Леске.

⁴¹Хем ало трито пути хем ваќерѓа ленге: „Панда ли совена хем одморинена? Достај тано, о саати ало! Еќе, предајненале е Манушикане Чхаве ко грешна васта. ⁴²Уштен, те џа! Еќе ало паше Мло предавнико!“

⁴³Хем одма, џи коте Ов панда ќерела лафи сине, ало о Јуда – јек таро Дешудуј Џене, хем олеја бари гужва, маченцар хем каштенцар; бичхавде таро главна свештениќа, книжниќа, хем старешине.

⁴⁴А Олескоро предавнико сине денѓален знако, ваќерибаја: „Кас ка чуминавле, Ови тано; астаренле Оле хем ингаренле пазиндор.“ ⁴⁵Хем кога ало, одма гело Леске паше хем ваќерѓа: „Рави! Рави!“ хем чуминѓале тато.

⁴⁶А ола чхиге васта ки Лесте хем астаргеле. ⁴⁷А јек таро окола, кој терѓона сине одотхе, икаѓа мачи хем кхуѓа е првосвештеникоскере слуга хем чхинѓа о кан лескоро.

⁴⁸О Исус пак одговоринѓа хем ваќерѓа ленге: „Иклилен сар разбојникоске, маченцар хем каштенцар, за да те астаренма! ⁴⁹Секова диве сијум сине туменцар ко Храми хем поучинава сине, ама на астаргенма. Ама, о Писмиа требела те исполнинѓовен!“

⁵⁰Тогаш, сарине муклеле хем нашле. ⁵¹А пали Лесте џала сине јек терно мануш, паќардо чаршафеја ко нанго тело, хем астаргеле оле; ⁵²ама ов мукља о чаршафи хем нашља нанго олендар.

О Исус англо о Синедриони

⁵³Хем ингарге е Исусе ко првосвештенико, хем кхедингепес са о главна свештениќа, старешине хем книжниќа. ⁵⁴А о Петар слединелале сине дуралдан са џи ко дворо е првосвештеникоскоро. Одотхе бешела сине е слугенцар хем таќола сине узи јаг.

⁵⁵А о првосвештениќа хем о цело Синедриони родена сине сведоштво против о Исус, за да те мударенле, ама на аракхле. ⁵⁶Соске бут џене сведочинена сине ховавно против Олесте, ама о сведоштвиа на сине иста.

⁵⁷Хем некој уштиле хем сведочинена сине ховавно против Олесте, ваќерибаја: ⁵⁸„Амен шунгемле сар ваќерела сине: ‘Ка рушинав акава вастенцар ќердо Храми хем баши трин диве ка градинав јавер – бивастенцар ќердо.’“ ⁵⁹Ама ни аѓаре оленгоро сведоштво на сине исто.

⁶⁰Тогаш о првосвештенико уштило ко машкар хем пучљале е Исусе, ваќерибаја: „Ништо ли на одговоринеја? Со сведоштвинена акала против Туте?“

⁶¹А Ов ќутинела сине хем ништо на одговоринѓа.

О првосвештенико пучљале палем: „Ту ли сијан о Христос, о Чхаво е Благословимескоро?“

⁶²А о Исус ваќерѓа: „Ме сијум. Хем тумен ка дикхен е Манушикане Чхаве, сар бешела оддесно е Силатар хем сар авела е небесно облаконцар!“

⁶³Тогаш о првосвештенико пхараѓа пле шеја хем ваќерѓа: „Соске потребно аменге веќе сведоќа? ⁶⁴Шунген богохулство! Сар дикхјола туменге?“

А ола сарине осудингеле дека заслужинела мериба.

⁶⁵Хем некој почминге те чхунгаренле хем те учхарен о муј Лескоро, те кхувенле боксенцар хем те ваќерен Леске: „Пророкујн!“ Хем о слуге кхувенале сине шамаркенцар.

О Петар одречинелапе

⁶⁶Хем кога о Петар сине теле, ко дворо, али јек таро слугинке е првосвештеникоскере; ⁶⁷хем кога дикхља е Петре, сар таќола, дикхљале хем ваќерѓа леске: „Хем туда сијан сине е Исусеја о Назарецо!“

⁶⁸Ама ов одречинѓа, ваќерибаја: „Ниту џанава, ниту хајљовава со ваќереја!“ Хем иклило авријал англал ко дворо хем о башно башља.

⁶⁹А и слугинка дикхљале хем почминѓа палем те ваќерел околенге, кој терѓона сине одотхе: „Хем акавај тано олендар!“

⁷⁰А ов палем одречинѓа.

Покасно, окола, кој терѓона сине одотхе, палем ваќерге е Петреске: „Чаче сијан олендар, соске хем туда сијан Галилејцо, а хем о ќериба лафи сложинелапес.“

⁷¹А ов почминѓа те делпе совел хем те асоќерелпе: „На џанавале е мануше баши Касте ваќерена!“ ⁷²Хем одма о башно башља по дујто пути.

А о Петар сетинѓапе ко лафиа, со ваќерѓа леске о Исус: „Англедер о башно те башел дуј пути, трин пути ка одречинетут Мандар.“ Хем почминѓа те ровел.