О Исус англо Пилат

¹Хем одма сабалескоро, о првосвештениќа, е старешиненцар хем е книжниконцар хем о цело Синедриони, пханлеле е Исусе, ингаргеле хем предајнгеле е Пилатеске.

²Хем о Пилат пучљале: „Ту ли сијан о Јудејско Царо?“

А Ов одговоринѓа леске хем ваќерѓа: „Ту ваќереја!“

³О првосвештениќа обвинингеле бут. Ама Ов на одговоринѓа ништо.

⁴А о Пилат палем пучљале: „Ништо ли на одговоринеја? Дик, кобор ќерена Тут криво!“

⁵Ама о Исус веќе ништо на одговоринѓа, аѓар со о Пилат чудинелапес сине.

⁶А ко секова празнико мукела ленге сине по јек затворнико, кас со ка роден. ⁷Сине ко синџира о ваќердо о Варава, пле бунтовниконцар, кој ки буна сине ќерге мудариба. ⁸Хем о народо викинѓа гласно хем почминѓа те роден одова, со секогаш ќерела сине ленге.

⁹А о Пилат одговоринѓа ленге, ваќерибаја: „Мангена ли те мукав туменге е Јудејско Царо?“ ¹⁰Соске џанела сине дека о првосвештениќа предајнгеле таро завист.

¹¹Ама о првосвештениќа чхивена сине е народон: пошукар те мукел ленге е Варава.

¹²А о Пилат пак одговоринѓа хем ваќерѓа: „Тогаш, со те ќерав Околеја, Кас со викиненале Јудејско Царо?“

¹³Ама ола викинге палем: „Распнинле!“

¹⁴О Пилат палем ваќерѓа ленге: „Саво билачхипа ќерѓа?“

Ама ола викинге панда посилно: „Распнинле!“

¹⁵Тогаш о Пилат, мангипаја те угодинел е народоске, мукља ленге е Варнава, а е Исусе, откога камшикујнгеле, предајнѓале те овел распнимо.

¹⁶О војниќа ингаргеле андре ко дворо, уствари ки Преторија, хем викинге цело чета. ¹⁷Хем урагеле пурпурна шеја: плетинге венцо таро каре хем чхиге ки Лесте. ¹⁸Хем почминге те поздравиненле: „Здраво, Јудејско Царе!“

¹⁹Хем кхувенале сине трскаја ко шеро, чхунгаренале сине хем перена сине ко кочиа, кланиненапе сине Леске. ²⁰А откога лелеле ко мајтапи, хуљаге Олестар и пурпурно наметка хем урагеле Олескере шеја, хем ингаргеле те распниненле.

Распниненале е Исусе

²¹Хем теринге јеке со накхела, о Симон Киринеец, кој иранелапе сине таро поле, о дат е Александрескоро хем е Руфескоро, те ингарел Олескоро крсто.

²²Хем ангеле ко тхан Голгота, со значинела Тхан е Черепескоро. ²³Хем денале сине мол смирнаја, ама Ов на приминѓа.

²⁴Пало одова распнингеле хем разделинге Олескере шеја, фрдибаја жрепка баши оленге, кој со те лел.

²⁵А сине трито саати, кога распнингеле. ²⁶Хем сине пишимо натпис, со означинела Олескири вина:

„ЈУДЕЈСКО ЦАРО.“

²⁷Хем Олеја распнинге дуј разбојниќа: јек тари десно, а јек тари лево, узи Лесте. ²⁸Хем пхердило о Свето Писмо кова ваќерела: ‘Хем генгeле машкар о билачхе.’

²⁹А окола со накхена сине хулиненале сине, иранибаја пумаре шере хем ваќерибаја: „Уа! Ту со рушинеја о Храми хем ѕидинејале баши трин диве, ³⁰спасинту Тут хем хули таро крсто!“

³¹Слично лелеле ко мајтапи о првосвештениќа, заедно е книжниконцар, ваќерибаја јек јавереске: „Е јаверен спасинѓа, а Пес нашти те спасинел! ³²О Христос – е Израелескоро Царо! Нека хулел акана таро крсто, те дикха хем те поверујна!“ Наврединенале сине хем окола, кој сине распниме Олеја.

³³А ко шовто саати, уло каранлуко ки цело пхув, џи ко ејнато саати. ³⁴А ко ејнато саати о Исус викинѓа силно гласоја: „Или! Или! Лама Савахтани!“ – со значинела: ‘Мо Девел, мо Девел, соске мукљанма!’

³⁵Штом шунге одова, некој таро окола, кој терѓона сине одотхе ваќерге: „Еќе, викинелале е Илија!“

³⁶Хем јек прастандило хем топинѓа сунгери ки киселина, чхиѓа ки трска хем денѓале те пијел, ваќерибаја: „Мукен, те дикха дали ка авел о Илија те хуљавеле!“

³⁷О Исус викинѓа силно гласоја хем издивнинѓа. ³⁸Хем е храмескири завеса пхаравсалили ко дуј, упралдан џи теле.

³⁹А кога дикхља о римско офицери кој терѓола сине спротив Лесте, дека аѓаре издивнинѓа, ваќерѓа: „Чаче, акава мануш сине Девлескоро Чхаво!“

⁴⁰А дуралдан дикхена сине хем ромња, машкар касте сине и Марија Магдалена, и Марија и дај е тикне Јаковескири хем е Јосијаскири, хем и Салома, ⁴¹кој џана сине пали Лесте, кога сине ки Галилеја, хем служинена Леске, хем бут јавера, кој але Олеја ко Ерусалим.

Е Исусескоро парубе

⁴²А кога веќе ратило, соске сине спреминенапе, уствари диве спроти сабота. ⁴³Ало о Јосиф тари Ариматеја, поштојмо советнико, кој хем коркори уџарела сине е Девлескоро Царство, осмелинѓапес хем кхуѓа ко Пилат хем родинѓа е Исусескоро тело.

⁴⁴А о Пилат чудинѓапес дека веќе муло; хем викинѓа е римско офицере хем пучљале дали муло одамна. ⁴⁵А штом дознајнѓа таро римско офицери, денѓале е Јосифеске о муло тело.

⁴⁶Ов кинѓа ленено платно, хуљаѓале, паќарѓале ко платно хем чхиѓале ко гробо, со сине ќердо дупка ки карпа, хем навалинѓа бар англо удар ко гробо. ⁴⁷А и Марија Магдалена хем и Марија е Јосијаскири дикхле коте тано чхивдо.