Марко 16

Е Исусескоро воскресение

¹А кога накхља и сабота, и Марија Магдалена, и Марија е Јаковескири хем и Салома кинге мирисиа, за да те авен хем те макхенле. ²Хем бут рано, ко прво диве е неделакоро, але ко гробо кога иклило о кхам. ³Хем ќерена сине лафи машкар песте: „Кој ка преместинел аменге о бар таро вудар е гробоскоро?“ ⁴Хем кога дикхлe, дикхле дека о бар тано преместимо. Уствари, сине бут баро.

⁵А кога кхуге ко гробо, дикхле терно ко дугачко парне шеја, сар бешела десно хем зачудингепес. ⁶Ама ов ваќерѓа ленге: „Ма даран! Тумен родена е распниме о Исус Назарецо. Воскреснинѓа! Нае тано акате! Еќе тано о тхан, коте со чхигеле. ⁷Него џан хем ваќерен ленге Олескере учениконге, хем е Петреске, дека Ов гело англедер туменде ки Галилеја; одотхе ка дикхенле, сар со ваќерѓа туменге.“

⁸А ола иклиле хем нашле таро гробо, соске леле те тресинен хем те даран. Хем никаске ништо на ваќерге, соске дарана сине.

⁹А кога воскреснинѓа рано, ко прво диве е неделакоро, јавинѓапес прво е Марија Магдаленаке, колатар сине палдинѓа евта демојна. ¹⁰Ој гели хем јавинѓа оленге околенге, кој сине Олеја, кој тугујнена сине хем ровена. ¹¹А ола, кога шунге декај тано џивдо хем дека ој дикхљале – на верујнге.

¹²Пало одова јавинѓапе ленге ко јавер лико, дује џененге олендар, ко друмо, кога џана сине ко гав.

¹³Хем ола геле хем јавинге оленге е јаверенге, ама хем оленда на верујнге.

И апостолско мисија хем о вознесение е Исусескоро

¹⁴Најпосле јавинѓапе ленге хем е Дешујеке Џененге, џи коте сине узи софра, хем укоринѓален баши оленгоро неверие хем закоравеност е срцескоро, соске на поверујнге олен околен, кој дикхлеле воскреснимо.

¹⁵Хем ваќерѓа ленге: „Џан ко цело свето хем проповединенле о Евангелие ко секова создание! ¹⁶Кој ка поверујнел хем крстинелапес, ка овел спасимо; а кој на поверујнела, ка овел осудимо. ¹⁷А акала знаќа ка овен оленцар, окола кој поверујнге: ко Мло анав ка палден демојна; ка ќерен лафи неве чхибја; ¹⁸ка астарен сапа; ако пијена хем нешто смртоносно – нае те поврединелен. Ка чхивен васта ко насвале хем ола ка сасќовен.“

¹⁹А о Господари о Исус, откога ваќерѓа ленге одова, вознесисалило ко небо хем бешља десно ко Девел.

²⁰А о учениќа геле хем почминге те проповединен сегде, о Господари сине оленцар хем преку о чудиа со ола ќеренален сине, потврдинела сине дека одова со ваќеренале тано чаче.