Romano Prevod Tari Biblija
AA

Матеј 17

О Христос преобразинелапе

1Хем пало шов диве о Исус леља Пеја: е Петаре, хем е Јакове хем о пхрал лескоро о Јован, хем ингарѓален ки учи гора насамо. 2Хем сине преобразимо англо ленде, о лико Олескоро светинѓа сар кхам, а Олескере шеја уле парне сар и светлина. 3Хем еќе, јавинѓапес ленге о Мојсеј хем о Илија хем ќерге лафи Олеја.

4А о Петар одговоринѓа хем ваќерѓа е Исусеске: „Господар, шукари тано баши аменге те ова акате; ако мангеја ка ќера акате трин шатојра: јек баши Туке, јек баши о Мојсеј хем јек баши о Илија.“

5Џикоте панда ќерела сине лафи ов, еќе, упра ленде светло облако, хем еќе, гласо таро облако ваќерела сине: „Акавај тано Мло мангло Чхаво, ки Касте Ми милина тани; шунен Оле!“ 6Хем кога о учениќа шунге одова, пеле мујеја ничкум хем бут дарандиле.

7А о Исус ало узо ленде паше, допринѓален хем ваќерѓа: „Уштен хем ма даран!“ 8Хем кога ола ваздинге пе јаќа, на дикхле никас, освен е Исусе Коркори.

9Хем кога хулиле тари гора, о Исус заповединѓа ленге, ваќерибаја: „Никаске ма ваќерен баши акава привидение, џикоте о Чхаво Манушикано на воскреснинела таро муле.“

10Хем Олескере учениќа пучлеле, ваќерге: „Соске тогаш о книжниќа ваќерена, дека о Илија англедер мора те авел?“

11А Ов одговоринѓа ленге хем ваќерѓа: „Чаче о Илија авела хем ка обновинел са. 12Ама, ваќерава туменге, дека о Илија веќе ало, хем на пенџаргеле, него ќерге леске сар со мангле. Аѓар хем о Чхаво Манушикано ка цидел олендар.“

13Тогаш о учениќа халиле дека ваќерела сине ленге баши о Јован Крстител.

О сасќариба е демонско месечаре

14Хем кога але ко народо јек мануш ало Леске, пело ко кочиа англо Лесте хем ваќерѓа: 15„Господар, смилујнтут мле чхавеске, соске тано месечари хем мучинелапес бут; соске често перела ки јаг хем често ко пани. 16Хем анѓумле ко Тле учениќа, а ола нашти сине те сасќаренле.“

17Хем о Исус одговоринѓа хем ваќерѓа: „О, неверно хем развратно родо! Џи кога ка овав туменцар? Џи кога ка трпинав тумен? Аненле Манге акате.“ 18Хем о Исус прекоринѓале, хем иклило о демони олестар, хем о чхаво сине састило таро одова саати.

19Тогаш о учениќа але узо Исус коркори хем ваќерге: „Соске нашти сине амен те палдале?“

20А Ов ваќерѓа ленге: „Баши тумаро неверие; соске чаче ваќерава туменге, ако иситумен вера кобор о синапово зрно, ка ваќерен акале гораке: ‘Преместинтут акатар одори!’, хем ка преместинелпес, хем ништо нае те овел туменге невозможно. 21А акаја врста на икљола освен преку молитва хем постиба.“

О Исус ваќерела баши Пло мерибе хем воскресение

22Хем џикоте сине заедно ки Галилеја, о Исус ваќерѓа ленге: „О Чхаво Манушикано ка овел предајмо ко васта манушикане, 23хем ка мударенле, хем ко трито диве ка овел воскреснимо.“ Хем ола бут нажалисалиле.

24А кога але ко Капернаум, окола со кхедена дуј драхме е храмеске даноко, але е Петареске хем ваќерге: „Зарем тумаро Учители на платинела дуј драхме?“

25Ов ваќерѓа: „Оја.“ Хем кога кхуѓа ко кхер о Исус предвидинѓале хем ваќерѓа: „Со мислинеја, Симон: е пхувјакере цајра кастар лена царина или данок, таро пле чхаве или таро јабанџие?“

26А о Петар ваќерѓа Леске: „Таро јабанџие.“ О Исус ваќерѓа леске: „Значи, о чхаве тане слободна. 27Ама за да ма те соблазнинален, џа џико море, фрде јадица хем ле о прво мачхо со ка икљол, хем кога ка пхраве о муј лескоро, ка аракхе статир*; леле хем делен ленге баши Манге хем баши туке.“

*Стихо 27: Статир тано јек врста железна паре.