Девел Кој са џанела

Баши о началнико е пејаченгоро. Е Давидескоро псалми.

¹Господар, дикхејаман цело хем пенџарејаман,

²Ту џанеја кога бешава хем кога уштава, веќе дуралдан џанејален ме мисле.

³Дали џава или пашљовава, Ту дикхеја са, пенџарде Туке са мле друмиа.

⁴Џи коте мо лафи панда на ало џи ки чхип, а Ту, Господар, веќе са џанеја.

⁵Ту опкружинејама, пало манде сијан, англи манде сијан, Тло вас чхивдој упра манде.

⁶Одова џандипа превише тано чудно баши манге, превише учо тано, за да те шај те ресавле.

О Девел тано сегде

⁷Коте те џав таро Тло Духо хем коте те нашав таро Тло муј?

⁸Ако вознесинавама ко небо: одотхе сијан, ако пашљовава телал ки пхув: хем одотхе сијан.

⁹Ако лавален о пака е рано сабалескере хем селинавама ко крајо е морескоро,

¹⁰хем одотхе, Тло вас ка водинелма, Тли десница ка иќерелма.

¹¹Ако ваќерава: „Нека гаравенма о каранлукиа,“ ама чак хем и рат ка овел сар светло околу манде!

¹²Ни о каранлуко баши Туке нае те овел темно: и рат светинела сар диве хем о каранлуко тано сар светлина.

¹³Соске Ту создајнѓан андрал со исиман, хем оформиринѓанма ме дајаке ко воги.

¹⁴Благодаринава Туке со сијум создајмо добором чудесно, сој тане Тле дејља шуже. Мли душа одова шукар џанелале.

¹⁵Мле кокала на сине Туке гаравде џи коте создајнаваман сине ко тајно, ќерде хор ки пхув.

¹⁶Тле јајкха дикхлема пред те овав ки суштина, веќе сине са пишимо ко Тло лил; о диве сине манге одредиме, панда џи коте на сине ни јек.

¹⁷Кобор тане манге вредна Тле плајна, Девла, кобор тане нашти те рачунинав ленгоро број!

¹⁸Те гејнавлен, повише тане тари пошик! Кога џангавѓовава, панда сијум Туја!

¹⁹Девла, уништинлен е билачхен, нека циденпе мандар окола со мангена те лен мо рат!

²⁰Соске ќерена бунт гаравутно против Туте, ко чучо вазденапес Тле душмајна.

²¹Господар, зарем те на мрзинавлен одола со мрзиненатут? Зарем те на гадојнапес лендар Тле противникондар?

²²Ме мрзинавален хор мржнаја, хем рачунинавален баши мле душмајна.

²³Испитинма цело, Девла, џан мо срце, испитинма хем џан ме пхаре мисле:

²⁴Дик те на џав пало билачхо друмо хем ингарма пало вечно друмо.