Бари нада ко Девел

Е Давидескоро Псалми

¹О Господари тано ми светлина хем спасение, кастар те дарав? О Господари тано заштита мле животоскоро, англо касте те овел ман дар?

²Кога ка авен паше узи манде о билачхе, мле противниќа хем душмајна, за да те хан мли снага, ола сопниненапе хем перена.

³Ако и војска уштела против манде, мло срце на дарала; ако избувнинела хем војна против манде, хем тогаш сијум пхердо надежеја.

⁴Баши јек молинава ман е Господареске, само одова родава: те живинав ке Господареске ко кхер, ко са о диве мле животоскере; те уживинав ке Господарескоро шужипа, хем те истражинав ко Олескоро Храми.

⁵Ов гаравела ман ко Пло шатори, ко билачхо диве; гаравела ман ко гаравутно тхан ко Пло шатори, Ов ваздела ман ки карпа.

⁶Хем акана ваздава мо шеро упро душмајна сој околу манде. Ка принесинав радосна жртве ко Олескоро шатори, ка гиљавав хем ка радујнав ман ко Господари.

⁷О, Господар, шун мо гласо кога викинава, ов манге милостиво хем одговорин манге!

⁸Мо срце ваќерела: „Роде Мо муј!“ Оја, родава Тло муј, Господар.

⁹Ма гарав Тло муј мандар! Ма фрделе ки холи Тле слуга! Ту, мли помош, ма отфрлин ман! Хем ма мук ман, Девла, мо Спасители!

¹⁰Ако мо дат хем ми дај мукена ман, о Господари ка приминел ман.

¹¹Сикав ман, Господар, ко Тло друмо, ингар ман ко рамно друмо, баши мле противниќа.

¹²Ма предајн ман ко ќефи мле душманенге, соске ховавне сведоќа уштиле против манде, кој дишинена силаја.

¹³Верујнава дека ка уживинавлен е Господарескере шукарипа ки пхув е џивденгири.

¹⁴Надин тут ко Господари, охрабрин тут! Нека овел цврсто тло срце! Оја, аџиќерле е Господаре!