Молитва баши туга е праведникоскири

Баши о прво музичари. Е Давидескоро Псалми.

(Ко време ки невоља.)

¹Ки Туте надинава ман, Господар, те на лаџаќерав ман никогаш: икав ман спрема Тли правда!

²Чхив паше ки манде Тло кан, сиѓар те ослободине ман! Ов манге цврсто карпа баши заштита, тврдина баши о спасение.

³Соске Ту сијан мли карпа, мли трвдина, баши Тло анав водин ман хем управин ман.

⁴Циде ман тари мрежа со чхиге манге тајно, соске Ту сијан ми сила.

⁵Ко Тло вас предајнава мло духо; Ту откупинѓан ман, Господар, Девел е Чачипаскоро.

⁶Мрзинава околен со поштојнена чуче идојља, а ме надинава ман ко Господари.

⁷Ка радујнав ман хем ка веселинав ман ко Тло милост; соске Ту дикхљан мли невоља, пенџарѓан и туга ки мли душа

⁸хем на предајнѓан ман ко васта е душманенге, икаѓан ме пре ко бувло друмо.

⁹Смилујн Тут манге, Господар, соске сијум ко тесно, тари туга слабонена ми јак, и душа хем о тело.

¹⁰Мо живото трошинѓовела ко ќеркипа, а мле берша ко офкиба. Ми сила гели ко муке, а мле кокала чхиндиле.

¹¹Баши са мле противниќа уљум ленге понижиме, баши асајбаске мле комшијенге хем те даран мандар о пенџарде; кој дикхена ман сине авријал, нашена мандар.

¹²Сијум сине бистердо сар муло ко срциа е манушенгере, уљум сар пхаго чаро.

¹³Шунава бут џене ќерена мо лафи, ужас секотар: договориненапе против манде хем дикхена сар те лен мо живото.

¹⁴А ме, Господар, ки Туте надинава ман, ваќерава: „Ту сијан мо Девел!“

¹⁵Мле диве тане ко Тло вас: икав ман таро вас мле душманенге хем таро окола кој гонинена ман.

¹⁶Нека светинел Тло муј ко Тло слуга, спасин ман Тле милостеја.

¹⁷Господар, те на лаџаќерав ман дека повикујнѓум Тут; нека лаџан о билачхе; нека ќутинен телал ки пхув.

¹⁸Нека лалорѓовен о ховавне вошта, со против о праведнико ќерена лафи дрско, ко барипа хем дикхена тут бут теле.

¹⁹О, кобор тано баро Тло шукарипа, со гаравејале баши окола, кој дарана Тутар, со спреминѓан ленге околенге, кој надиненапе ки Туте, англо јајкха е манушенгере чхавенге!

²⁰Гаравејален тело штити Тле мујескоро, таро манушенгере билачхе плајна; гаравејален ко Тло шатори таро билачхе чхибја.

²¹Благословимо те овел о Господари, соске јавинѓа манге Пли чудесно милост, ки зорали диз.

²²Веќе помислинѓум, ки мли буна: „Отфрлимо сијум таро Тло дикхиба.“ Ама Ту шунѓан мо гласо тари мли молба, кога викинѓум Тут.

²³Мангенле е Господаре са Олескере светие; о Господари аракхелален Пле вернон, а спрема и заслуга иранела околенге, кој понашиненапе ко баро.

²⁴Овен храбра хем Ов ка зојраќерел тумаре срциа, сарине, кој надинена тумен ко Господари!