Romano Prevod Tari Biblija

Псалм 34

Псалм 34

Псалм баши благодарност хем надеж

Е Давидескоро Псалми.

(Кога ов ќерѓапе делино англо Авимелех, кој палдинѓале хем аѓар гело дур.)

1Ка благословинавле е Господаре ко секова време, Олескири пофалба увек ка овел манге ко муј!

2Мли душа ка фалинелпе е Господареја: нека шунен адава о понизна хем нека радујненпе!

3Вазденле ко баро е Господаре манцар, заедно те вазда упре Олескоро анав!

4Родинѓум е Господаре хем Ов шунѓама, икаѓама тари са ми дар.

5Дикхле ки Лесте хем светинѓа ленге англо јајкха, хем на ка лаџаќеренпе о муја ленгере!

6Акава бедно викинѓа хем о Господари шунѓале, икаѓале таро са олескере невоље.

7Е Господарескоро ангели ќерела стража околу окола со дарана Олестар, хем избавинелален.

8Укусинен хем дикхен кобори тано шукар о Господари: блажено тано о мануш, кој надинелапе ки Лесте!

9Даран таро Господари, тумен Олескере светие, соске нае те фалинел ништо баши окола со дарана Олестар.

10О терне лавиа трпинена беда хем мерена бокхатар, а кој роденале е Господаренае те трпинен те фалинел ленге ништо.

Пазинен тумен таро грево

11Авен, чхавален, хем шуненма, ка сикавав тумен баши дар таро Господари.

12О, мануша! Мангеја ли о живото? Мангеја ли бут диве, за да те дикхе шукар?

13Иќер ти чхип таро билачхипе хем тле вошта таро ховавно лафиќерибе!

14Цидетут таро билачхипе хем ќер шукар, роде мир хем џа пали лесте!

15Е Господарескере јајкха дикхена е праведнон, Олескере кана шунена оленгоро викиба.

16Е Господарескоро муј иранелапе против о билачхе, за да те уништинел ленгоро спомен ки пхув.

17О праведниќа викинена, о Господари шунелален, избавинелален таро са оленгере беде.

18О Господари тано паше узо окола сој тане пхаге срцеја, хем спасинела околен, сој тане покајбаскере духоја.

19Е праведнико исиле бут невоље, ама о Господари икавелале таро са.

20Ов аракхела са олескере кокала, ниту јек олендар нае те пхаѓол.

21О билачхипе ка мударел е невернико, ка платинен ола со мрзинена е праведнико.

22О Господари избавинела и душа Пле слугенгири хем нијек, таро одола со надиненапе ки Лесте нае те овен осудиме.