Испит е веракоро

Баши о началнико е пејаченгоро, пали е Едутуна.

Е Давидескоро псалми.

¹Мли душа, о мир тано само ко Девел, о спасение тано само ки Лесте.

²Само Ови тано мли заштита хем спасение, млo зорало тхан: нае те поколебинав ман.

³Џи кога ка фрден тумен упро мануш, за да те уништиненле сарине заедно, сар разрушимо ѕидо или навалими ограда?

⁴Ќергепе лафи те фрден ман таро мло учипе, уживинена ко ховајба; благословинена мујеја, а дена армајна срцеја.

⁵Мли душа, о мир тано само ко Девел, мли надеж тани само ки Лесте.

⁶Само Ови тано мли заштита хем спасение, мло зорало тхан: нае те поколебинав ман.

⁷Ко Девел тано мло спасение хем слава; о Девел тано ми силно карпа хем тхан гарајбаскоро.

⁸Надинен тумен ки Лесте, народален, ко секова време, чхорен тумаре срциа англи Лесте: о Девел тано амаро тхан коте со шај те гарава амен!

⁹О чхаве е манушенгере тане суетна, ховајба тане о манушикане чхаве: сарине те терѓовен ко кантари, ка овен полокхе тари суета.

¹⁰Ма надинен тумен те малтретиринен некас хем силаја те лен, ниту те фалинен тумен суетно одова со чордој; ако барило тумаро барвалипе, тумаро срце нека ма те прилепинелпе ки лесте.

¹¹О Девел ваќерѓа јек, а ме шунѓум дуј: „И сила тани ко Девел!“

¹²Господар, ки Туте тано о шукарипа! Ту иранеја секаске според о дејља.