Тит 2

Сар ваљани те овен

¹А ту ваќер баши окова со сложинелапес е састе наукаја: ²о пхуре те овен трезвена, чесна, гоѓавера, састе ки вера, ко мангипе, ко трпение; ³исто аѓар о попхуре џувља те понашиненпес сар со бешела е светиенге, те на клеветинен, те на предајненпес бут ки мол, него те овен учителке баши шукарипа, ⁴за да те сикавен е терне џувлен те мангенлен пумаре ромен хем пумаре чхавен, ⁵те овен гоѓавера, чиста, шукар домакице, покорна пумаре роменге, за да ма те хулинелпес е Девлескоро Слово.

⁶Исто аѓар, опоменин е тернен те овен сар со ваљани гоѓавера, ⁷деjбајату тут ко са сар пример баши шукар дејља, ки наука – бизо румиме буќа, достоинство, ⁸састо хем бизо те фалинел дисаво лафи, за да те лаџал секова противнико, те на овеле со те ваќерел билачхе баши аменге.

⁹Опоменин е робон, за да те покориненпес пумаре господаренге, те на ачховен те угодинен ленге, те на ваќерен ленге против, ¹⁰те на чорен, него те сикавен пли шукар верност, та те украсинен ко са и наука амаре Спасителескири хем Девел.

Е Девлескири благодат анела спасение

¹¹Соске јавинѓапес е Девлескири благодат, која анела спасение баши о са о мануша, ¹²која воспитинеламен те откажинамен таро бизодевлипа хем о светска похоте, те живина гоѓавер, праведно хем девликано ко авдисутно веко, ¹³аџиќерибаја и блажено надеж хем о славно јавиба амаре Семоќно Девлескири хем Спасители, о Исус Христос, ¹⁴Кој денѓапес Коркори Пес место аменге, за да те избавинел амен таро секова беззаконие хем те очистинел баши Песке сопствено народо, кој припадинела Олеске, кој прастана баши шукар дејља.

¹⁵Ваќерле акава хем опоменин, хем викин ленге целосно властеја, никој те на презиринелтут!