Спасинѓамен пали Пли милост

¹Потсетинлен те покориненпес е началствонге хем е властенге, те овен послушна, те овен готова баши секова шукар дело, ²никас те на хулинен, те на препириненпес, те овен мирна, те сикавен секова кроткост ко са о мануша.

³Соске хем аменда сијем сине некогаш бизогоѓакере, на покоринајамен сине, нашавде таро право друмо, робиа баши разно страстенге хем задоволствиа, живибаја ко билачхипе хем завист, мрзиме хем мрзинајамен сине јек јавереја.

⁴Ама кога јавингепе: о шукарипа хем о мангипе е манушенге е Девлескоро, амаро Спасители, ⁵спасинѓамен на упри основа е праведно делонгири со ќергемлен амен, него пали Пли милост преку тхојбе е невебијанибаскоро хем со ќерѓамен неве о Свети Дух, ⁶Кас со изобилно чхорѓа упри аменде преку о Исус Христос, амаро Спасители, ⁷та оправдиме преку Олескири благодат те ова наследниќа според и надеж таро вечно живото. ⁸Верно тано одова слово, хем мангава акава те иќереле цврсто; хем окола, кој верујнена ко Девел те грижиненпес те џан англал ко шукар дејља. Одовај тано шукар хем корисно баши о мануша.

Избегинлен акала буќа

⁹А избегинлен: о глупава пучиба, о родословие, о расправие, хем о препирке пало однос е Законескере, соске тане некорисна хем суетна.

¹⁰Избегин мануш со банге верујнела, пало прво хем дујто опомена, ¹¹џандипаја дека асавко мануш иранѓапес хем дека грешинела, та осудинѓапес коркори пес.

Те овен прва ко шукар дејља

¹²Кога ка бичхававлен ки туте е Артема или о Тихик, сиѓар те аве ки манде ко Никопол, соске решинѓум те накхавав о јевен одори! ¹³Грижливо снабдинлен баши друмоске о правнико о Зина хем о Аполос, за да те овелен са со требела ленге! ¹⁴Ама хем амаре те сикљовен те овен прва ко шукар дејља, коте сој тано одова чаче потребно, за да ма те овен бизо плоди.

¹⁵Поздравиненатут сарине, кој тане манцар. Поздравин околен, кој мангенамен ки вера. И благодат сариненцар туменцар. Амин!